వర్క్‌ ఫ్రం హోమ్‌ అంత ఈజీ కాదు.. వైరల్‌ అవుతున్న ఉద్యోగి అనుభవం

ఇంటి నుంచే పని చేస్తే సమయం ఆదా అవుతుందని, జీవితం మరింత సౌకర్యంగా ఉంటుందని అనుకున్న ఓ యువకుడు.. నెల రోజుల్లోనే తన అభిప్రాయం పూర్తిగా మారిపోయిందని చెప్పాడు. వర్క్‌ ఫ్రమ్‌ హోమ్‌ వల్ల ఒంటరితనం, మనుషులతో సంబంధాలు తగ్గిపోవడం తనను తీవ్రంగా ప్రభావితం చేశాయని సోషల్‌ మీడియాలో పంచుకున్న వీడియో ఇప్పుడు వైరల్‌గా మారింది.

నమన్‌ అనే యువకుడు తన అనుభవాన్ని వివరిస్తూ.. ‘‘ప్రయాణానికి వెచ్చించే సమయం ఆదా అవుతోంది. కానీ ఆ సమయానికి విలువ ఏంటి? రోజంతా ఎవరితోనూ మాట్లాడటం లేదు. ఆఫీస్‌లో ఉండే చిన్న చిన్న సంభాషణలు, సహచరులతో కలిసి పనిచేసే వాతావరణం ఇప్పుడు చాలా మిస్‌ అవుతున్నా’’ అని చెప్పాడు.

ఉద్యోగం కోసం ఎదురుచూసిన రోజులు గుర్తు చేసుకున్న అతడు.. ఉద్యోగం వచ్చిన తర్వాత స్వేచ్ఛ కావాలనిపించిందని తెలిపాడు. ‘‘మనిషి ఎప్పుడూ తర్వాతి లక్ష్యం కోసం పరుగులు తీస్తూనే ఉంటాడు. ప్రస్తుతం ఉన్న దానితో సంతృప్తి చెందడం చాలా అరుదు’’ అని అభిప్రాయపడ్డాడు.

జీవితంలో ఫలితం గురించే కాకుండా ప్రయాణాన్ని కూడా ఆస్వాదించాలని సూచించాడు. ‘‘చివరికి అందరం ఒకే చోటుకు చేరతాం. కాబట్టి ఫలితం గురించి ఎక్కువగా ఆలోచించకుండా, చేస్తున్న పనిని ఆస్వాదించాలి’’ అని చెప్పాడు.

ఈ వీడియోకు సోషల్‌ మీడియాలో భారీ స్పందన వచ్చింది. వర్క్‌ ఫ్రమ్‌ హోమ్‌ వల్ల తామూ ఇలాంటి అనుభవాలే ఎదుర్కొన్నామని చాలామంది కామెంట్లు చేశారు. మరికొందరు సరదాగా స్పందిస్తూ.. ‘‘మేనేజర్‌ ఇన్‌స్టాగ్రామ్‌లో ఫాలో కాకపోతే ఇలాంటి మాటలే వస్తాయి’’ అంటూ చమత్కరించారు.