ఈ చిన్న చిన్న పనులే పిల్లల్లో తెలివితేటల్ని పెంచుతాయి!

పుట్టిన తర్వాత తొలి మూడు సంవత్సరాలు పిల్లల మెదడు అత్యంత వేగంగా అభివృద్ధి చెందుతుందని తాజా పరిశోధనలు చెబుతున్నాయి. ఈ సమయంలో తల్లిదండ్రులు చేసే చిన్న చిన్న పనులే పిల్లల నేర్చుకునే సామర్థ్యాన్ని, తెలివిని పెంచుతాయని శాస్త్రవేత్తలు వెల్లడించారు. ఖరీదైన బొమ్మలు, ప్రత్యేక శిక్షణ అవసరం లేదని తెలిపారు. రోజువారీ అలవాట్లే పిల్లల మెదడు ఎదుగుదలకు బలమైన పునాది వేస్తాయని వివరించారు.

నిపుణుల ప్రకారం.. తల్లిదండ్రులు పిల్లలతో ఎక్కువగా మాట్లాడాలి. రోజంతా ఏం చేస్తున్నారో గట్టిగా వారికి చెబితే భాషా నైపుణ్యాలు మెరుగుపడతాయి. పిల్లలు సమాధానం చెప్పకపోయినా ప్రశ్నలు అడగాలి. దీనివల్ల మాటలను అర్థం చేసుకునే సామర్థ్యం పెరుగుతుంది.

చిన్నారులతో ముద్దుగా, నెమ్మదిగా మాట్లాడటం కూడా మంచిదే. ఇలా చేస్తే వారు మాటలను త్వరగా గుర్తిస్తారు. రోజూ లాలిపాటలు, చిన్నపిల్లల పాటలు పాడాలి. భాష, జ్ఞాపకశక్తి అభివృద్ధికి సంగీతం తోడ్పడుతుంది. వివిధ రకాల మ్యూజిక్‌ వినిపించడం కూడా ఉపయోగకరంగా ఉంటుంది. దీనివల్ల వారిలో వినే నైపుణ్యాలు, గ్రహణ శక్తి అభివృద్ధి చెందుతుంది.

పుట్టినప్పటి నుంచే బొమ్మలున్న పుస్తకాలు చూపించాలి. వాటి పేర్లు చెప్పాలి. ఇది వారిలో భాషపై ఆసక్తిని పెంచుతుంది.  పదజాలాన్ని మెదడులో నిక్షిప్తం చేస్తుంది. రోజూ కొంతసేపు పిల్లలను పొట్టపై పడుకోబెట్టుకోవాలి. ‘పీక్‌-ఏ-బూ’ వంటి చిన్న ఆటలు ఆడించాలి. ఇవి ఆలోచనా శక్తిని పెంచుతాయి.

సున్నితంగా మసాజ్ చేయడం, దగ్గరగా హత్తుకోవడం కూడా మంచిదే. దీనివల్ల పిల్లల్లో భద్రత భావన పెరుగుతుంది. తల్లిదండ్రులు పిల్లలకు ఎప్పుడూ అందుబాటులో ఉండాలి. స్థిరమైన ప్రేమ, శ్రద్ధ మెదడు ఎదుగుదలకు ఎంతో అవసరం. తల్లిపాలు మెదడు నిర్మాణానికి ఎంతో మేలు చేస్తాయి.