'ప్రాసెస్డ్ ఫుడ్ చెడ్డది' అని చెప్పడానికి శాస్త్రీయ ఆధారాలు లేవు: చిరాగ్ పాశ్వాన్

‘ప్రాసెస్డ్ ఫుడ్ అంతా చెడ్డది’ అంటూ సామాజిక మాధ్యమాల్లో జరుగుతున్న ప్రచారాన్ని కేంద్ర ఫుడ్ ప్రాసెసింగ్ శాఖ మంత్రి చిరాగ్ పాశ్వాన్ ఖండించారు. ఈ అభిప్రాయం శాస్త్రీయ ఆధారాలపై ఆధారపడి లేదని, దీనిని ప్రతిఘటించాలని స్పష్టం చేశారు. ఢిల్లీలో ఫుడ్ కంపెనీ ‘ఫార్మ్‌లీ’ నిర్వహించిన ఇండియన్ హెల్తీ స్నాకింగ్ సమ్మిట్లో ఆయన మాట్లాడుతూ... ఆహార తయారీ కంపెనీలు నాణ్యతను తన ప్రధాన ప్రాధాన్యతగా ఉంచాలని సూచించారు. ఉత్పత్తుల నాణ్యత మెరుగుపరచడం ద్వారా వినియోగదారుల విశ్వాసం పెంపొందించుకోవాలని, భారతీయ ఆహార ఉత్పత్తులకు ప్రపంచవ్యాప్త గుర్తింపు తెచ్చుకోవాలని అన్నారు.

సోషల్ మీడియా ఇన్‌ఫ్లుయెన్సర్లు సృష్టిస్తున్న ‘ప్రాసెస్డ్ ఫుడ్ చెడ్డది’ అనే అభిప్రాయం శాస్త్రీయ ఆధారాలు లేనిదని పాశ్వాన్ అన్నారు. దీనిని ఎదుర్కోవడానికి అన్ని వర్గాలతో కమిటీని ఏర్పాటు చేశామని తెలిపారు. యువతలో ఊబకాయం సమస్య పెరుగుతోందని... ఆరోగ్యవంతమైన, పోషకాలు అధికంగా ఉండే స్నాక్స్, ప్రాసెస్డ్ ఫుడ్స్ అభివృద్ధి చేయాలని కంపెనీలను కోరారు. భారతీయ ప్రమాణాలు ప్రపంచ స్థాయి ప్రమాణాలుగా గుర్తింపు పొందాలని ఆకాంక్షించారు.

ఆహార ప్రాసెసింగ్ రంగంలో ఉపాధి అవకాశాలు, రైతుల ఆదాయం పెంపు, పంటల వ్యర్థాలు తగ్గించడం, ఎగుమతులు పెంచడం వంటి అనేక రంగాల్లో మన దేశానికి భారీ సామర్థ్యం ఉందని చిరాగ్ పాశ్వాన్ వివరించారు. గత 12 ఏళ్లలో కేంద్ర ప్రభుత్వం ఈ రంగాన్ని బలోపేతం చేయడానికి అనేక చర్యలు తీసుకుందని, 100 శాతం విదేశీ పెట్టుబడులను అనుమతించడం వంటి చర్యలు చేపట్టిందని తెలిపారు. రైతులకు సహజ, ఆర్గానిక్ వ్యవసాయం గురించి అవగాహన కల్పించాలని, పంటల వైవిధ్యీకరణ చేపట్టాలని కంపెనీలను సూచించారు. ఆహార ప్రాసెసింగ్ రంగంలో స్టార్టప్‌లు, ఆవిష్కరణలను ప్రోత్సహించడానికి కేంద్ర ప్రభుత్వం సహకరిస్తోందని చెప్పారు.