"మేడమ్ భుట్టో నిద్రపోతున్నారు".. విమానం హైజాక్ వేళ పాక్ తీరుపై మాజీ దౌత్యవేత్త సంచలన వ్యాఖ్యలు

సింగపూర్ మాజీ దౌత్యవేత్త బిలహరి కౌశికన్ సుమారు 35 ఏళ్ల క్రితం చోటుచేసుకున్న విమాన హైజాక్ ఘటనను గుర్తుచేసుకుంటూ పాకిస్థాన్ నాయకత్వ వైఖరిపై తీవ్ర విమర్శలు గుప్పించారు. అత్యంత సంక్లిష్టమైన పరిస్థితుల్లో సైతం ఆ దేశ నేతలు ఎంత బాధ్యతారహితంగా వ్యవహరిస్తారో వివరించడానికి, నాటి హైజాక్ సమయంలో అప్పటి ప్రతిపక్ష నాయకురాలు బెనజీర్ భుట్టోను నిద్రలేపేందుకు ఆమె సిబ్బంది నిరాకరించిన ఉదంతాన్ని ఆయన వెల్లడించారు.

1991 మార్చి 26న సింగపూర్ ఎయిర్‌లైన్స్‌కు చెందిన SQ 117 విమానాన్ని నలుగురు పాకిస్థానీయులు హైజాక్ చేశారు. కౌలాలంపూర్ నుంచి విమానం బయల్దేరిన కొద్దిసేపటికే ఈ ఘటన చోటుచేసుకుంది. పాకిస్థాన్ పీపుల్స్ పార్టీ (పీపీపీ)కి చెందిన ఆ హైజాకర్లు విమానాన్ని సింగపూర్‌లోని చాంగి విమానాశ్రయానికి మళ్లించారు. జైల్లో ఉన్న తమ పార్టీ సహచరులను తక్షణమే విడుదల చేయాలని, బెనజీర్ భుట్టోతో తమను మాట్లాడించాలని వారు డిమాండ్ చేశారు.

ఆ సమయంలో సింగపూర్ విదేశాంగ మంత్రిత్వ శాఖలో కీలక బాధ్యతల్లో ఉన్న కౌశికన్, పాకిస్థాన్ హైకమిషన్ సహకారంతో భుట్టోను సంప్రదించేందుకు ప్రయత్నించారు. తెల్లవారుజామున ఆమె నివాసానికి ఫోన్ చేయగా, "మేడమ్ నిద్రపోతున్నారు, ఇప్పుడు ఆమెను నిద్రలేపడం సాధ్యపడదు" అని అక్కడి సిబ్బంది సమాధానమిచ్చారని కౌశికన్ పేర్కొన్నారు. విమానం హైజాక్‌కు గురైందని, ప్రాణాపాయ స్థితి నెలకొందని వివరించినప్పటికీ వారు ఏమాత్రం పట్టించుకోలేదని ఆయన వివరించారు.

చివరికి సింగపూర్ కమాండోలు మెరుపు దాడి నిర్వహించి, నలుగురు హైజాకర్లను హతమార్చి ప్రయాణికులందరినీ సురక్షితంగా రక్షించారు. ఈ ఉదంతాన్ని ఉటంకిస్తూ కౌశికన్, పాకిస్థాన్ ప్రస్తుత దుస్థితికి పొరుగు దేశాలతో ఉన్న సరిహద్దు వివాదాల కంటే, ఆ దేశ అంతర్గత నాయకత్వ లోపాలు, మిలటరీ జోక్యం మరియు ఫ్యూడల్ పోకడలే ప్రధాన కారణమని విశ్లేషించారు.