భారతీయుల నిజాయితీకి ఫిదా.. వైరల్ అవుతున్న పోలాండ్ మహిళ పోస్ట్
- ఢిల్లీ కెమిస్ట్ షాపులో మందులు మర్చిపోయిన పోలాండ్ మహిళ
- నాలుగు రోజుల తర్వాత వెళ్లినా భద్రంగా తిరిగిచ్చిన వ్యాపారి
- భారతీయుల నిజాయితీని మెచ్చుకుంటూ ఇన్స్టాగ్రామ్లో వీడియో పోస్ట్
- వైరల్ అయిన వీడియో.. భారతీయుల మంచితనంపై నెటిజన్ల ప్రశంసలు
డొమినికా పటాలాస్-కల్రా అనే పోలిష్ మహిళ కొంతకాలంగా భారత్లో నివసిస్తున్నారు. కొద్ది రోజుల క్రితం ఢిల్లీలోని ఒక మెడికల్ షాపులో మందులు కొనుగోలు చేసిన ఆమె, పొరపాటున వాటిని అక్కడే వదిలి వెళ్లారు. వ్యక్తిగత పనుల నిమిత్తం నగరంలో లేకపోవడంతో, నాలుగు రోజుల తర్వాత తిరిగి వచ్చి ఆ దుకాణానికి వెళ్లారు. అయితే, ఆ దుకాణ యజమాని ఆమె మందుల ప్యాకెట్ను భద్రంగా దాచి ఉంచి, అడగ్గానే తిరిగి ఇచ్చేశారు.
ఈ అనుభవం తనను ఆశ్చర్యానికి గురిచేసిందని డొమినికా తన వీడియోలో పేర్కొన్నారు. "భారతదేశం అంటే నాకు అందుకే ఇష్టం. ఇంత పెద్ద దేశంలో, ఇంత జనాభా ఉన్నప్పటికీ ఇలాంటి నిజాయితీతో కూడిన సంఘటనలు జరగడం విశేషం. నా మందులు నా కోసం భద్రంగా ఉన్నాయి" అని ఆమె సంతోషం వ్యక్తం చేశారు.
ఈ వీడియోపై నెటిజన్ల నుంచి విశేష స్పందన లభిస్తోంది. చాలామంది తమకు ఎదురైన ఇలాంటి నిజాయితీ కలిగిన సంఘటనలను కామెంట్ల ద్వారా పంచుకుంటున్నారు. సామాన్య భారతీయులలో కనిపించే ఈ నమ్మకం, మంచితనం ప్రశంసనీయమని వారు అభిప్రాయపడుతున్నారు. ఒక చిన్న సత్కార్యం ఇతరులపై ఎంతటి సానుకూల ప్రభావాన్ని చూపుతుందో ఈ సంఘటన మరోసారి నిరూపిస్తోంది.
