బెంగళూరులోని ఓ డేకేర్ కేంద్రంలో 2-3 ఏళ్ల వయసున్న చిన్నారులపై అమానుషంగా ప్రవర్తించిన ఘటన కలకలం రేపింది. ఏడుస్తున్న చిన్నారులను వాషింగ్‌ మెషీన్‌లో కూర్చోబెట్టడం, టాయిలెట్ జెట్‌ స్ప్రేతో నోట్లోకి నీళ్లు చల్లడం, బాత్‌రూమ్‌లో బంధించడం వంటి శిక్షలు విధించినట్లు ఆరోపణలు వచ్చాయి.

ఈ ఘటన నగరంలోని క్యాప్‌జెమినీ సంస్థ హెచ్‌ఏఎల్‌ క్యాంపస్‌లో నిర్వహిస్తున్న డేకేర్ కేంద్రంలో జరిగినట్లు పోలీసులు తెలిపారు. చిన్నారులను భయపెట్టి మౌనంగా ఉంచేందుకే ఇలాంటి అమానుష చర్యలకు పాల్పడినట్లు విచారణలో వెల్లడైంది. ఈ ఘటనకు సంబంధించిన వీడియోలు సోషల్ మీడియాలో వైరల్ కావడంతో పోలీసులు కేసు నమోదు చేశారు.

డేకేర్‌లో పనిచేస్తున్న ఐదుగురు మహిళా సంరక్షకులపై కేసు నమోదు చేశారు. మరోవైపు ఈ వ్యవహారంపై కర్ణాటక రాష్ట్ర బాలల హక్కుల పరిరక్షణ కమిషన్‌కు కూడా ఫిర్యాదు అందింది. కార్పొరేట్ కార్యాలయాల్లో నడుస్తున్న డేకేర్ కేంద్రాల భద్రత, పర్యవేక్షణపై ఈ ఘటన తీవ్ర ఆందోళనకు దారితీసింది.