ప్రైమ్ వీడియో కస్టమర్లకు అన్యాయం.. అమెజాన్ను కోర్టుకు ఈడ్చిన ఆస్ట్రేలియా ప్రభుత్వం
- ప్రైమ్ వీడియోలో యాడ్స్ వేయడంపై ఆస్ట్రేలియాలో అమెజాన్పై కేసు
- యాడ్స్ లేకుండా చూడాలంటే అదనపు డబ్బులు వసూలు చేయడంపై వివాదం
- అన్యాయమైన ఒప్పంద నిబంధనలతో వినియోగదారులను మోసం చేసిందని ఆరోపణ
- లక్షలాది మంది వార్షిక చందాదారులపై ఈ మార్పుల ప్రభావం పడిందని వెల్లడి
- అమెజాన్పై భారీ జరిమానా, వినియోగదారులకు నష్టపరిహారం కోరుతున్న ఏసీసీసీ
వివాదానికి కారణమేమిటి?
ఈ వివాదం 2024లో అమెజాన్ తన ప్రైమ్ వీడియో సేవలో ప్రకటనలను చేర్చడంతో మొదలైంది. ఏసీసీసీ వాదన ప్రకారం.. అప్పటికే వార్షిక చందా చెల్లించిన లక్షలాది మంది సబ్స్క్రైబర్లు, ఎలాంటి ముందస్తు స్పష్టత లేకుండా యాడ్స్తో కూడిన సేవను పొందాల్సి వచ్చింది. ఎవరైనా ప్రకటనలు లేకుండా మునుపటిలా వీడియోలు చూడాలనుకుంటే, నెలకు అదనంగా 2.99 ఆస్ట్రేలియన్ డాలర్లు చెల్లించాలని అమెజాన్ షరతు విధించింది. ఏడాదికి 79 డాలర్లు చెల్లించి వార్షిక సభ్యత్వం తీసుకున్న వారికి ఇది తీవ్ర అన్యాయమని ఏసీసీసీ ఆరోపించింది.
ఈ మార్పులు చేసిన సమయంలో ఇప్పటికే 8.5 లక్షల మందికి పైగా ఆస్ట్రేలియన్ వినియోగదారులు వార్షిక చందా చెల్లించి ఉన్నారు. అదనపు రుసుము చెల్లించని వారికి, వారు డబ్బు చెల్లించిన సేవలో కోత విధించినట్లు అయ్యిందని (డౌన్గ్రేడ్) ఏసీసీసీ తన పిటిషన్లో పేర్కొంది.
ఏసీసీసీ చైర్ గినా కాస్-గాట్లిబ్ ఒక ప్రకటనలో మాట్లాడుతూ.. "అమెజాన్ తన వార్షిక ప్రైమ్ ఒప్పందాలలో అనేక అన్యాయమైన నిబంధనలను చేర్చింది. వాటిని అడ్డం పెట్టుకునే ప్రైమ్ వీడియోలో ప్రకటనలను ప్రవేశపెట్టింది" అని వివరించారు.
కేవలం యాడ్స్ సమస్యే కాదు
ఈ కేసు కేవలం యాడ్స్ ప్రదర్శనకు మాత్రమే పరిమితం కాలేదు. అమెజాన్ తన ఒప్పందాలలో చేర్చిన ఐదు కీలక నిబంధనలను ఏసీసీసీ లక్ష్యంగా చేసుకుంది. ఈ నిబంధనలు సబ్స్క్రైబర్లకు ఎలాంటి వాపసు లేదా సరైన నష్టపరిహారం ఇవ్వకుండానే ప్రైమ్ సేవలలో ఏకపక్షంగా, ముఖ్యమైన మార్పులు చేయడానికి అమెజాన్కు అధికారం కట్టబెట్టాయని ఏసీసీసీ వాదిస్తోంది. 2023 నవంబర్ నుంచి 2025 ఆగస్టు మధ్య కాలంలో పది లక్షల మందికి పైగా కస్టమర్లు సంతకం చేసిన ఒప్పందాలలో ఈ నిబంధనలు ఉన్నాయని రెగ్యులేటర్ పేర్కొంది.
వినియోగదారుల నుంచి వచ్చిన ఫిర్యాదుల ఆధారంగా ఏసీసీసీ ఈ దర్యాప్తును ప్రారంభించింది. ఈ కేసులో అమెజాన్కు భారీ జరిమానా విధించాలని, ప్రభావితమైన వినియోగదారులకు నష్టపరిహారం ఇప్పించాలని, కోర్టు ఖర్చులు చెల్లించాలని ఏసీసీసీ న్యాయస్థానాన్ని కోరింది.
ఈ ఆరోపణలపై అమెజాన్ ఆస్ట్రేలియా ప్రతినిధి స్పందిస్తూ.. "ఏసీసీసీ దాఖలు చేసిన కేసును మేము క్షుణ్ణంగా సమీక్షిస్తున్నాము. దర్యాప్తు ప్రారంభమైనప్పటి నుంచి మేము రెగ్యులేటర్కు పూర్తిగా సహకరించాము" అని తెలిపారు. దశాబ్దానికి పైగా ప్రకటనలు లేకుండా అందుబాటులో ఉన్న ప్రైమ్ వీడియో, 2024 ప్రారంభం నుంచి ప్రపంచవ్యాప్తంగా పలు దేశాల్లో యాడ్స్ను ప్రవేశపెట్టడం గమనార్హం.
