రామమందిరం విరాళాల కేసు.. అత్యవసర విచారణకు సుప్రీంకోర్టు నో

అయోధ్య రామమందిర విరాళాల చోరీపై దాఖలైన ప్రజాహిత వ్యాజ్యాన్ని అత్యవసరంగా విచారించేందుకు సుప్రీంకోర్టు నిరాకరించింది. వేసవి సెలవులు ముగిసిన వెంటనే ఈ పిటిషన్‌ను విచారణకు తీసుకుంటామని స్పష్టం చేసింది. ఈ అంశంలో అంత అత్యవసరం ఏమిటని ధర్మాసనం ప్రశ్నించింది.

జస్టిస్ ఎం.ఎం. సుంద్రేశ్, జస్టిస్ షీల్ నాగు ధర్మాసనం ముందు ఈ పిటిషన్ ప్రస్తావనకు వచ్చింది. పిటిషనర్ తరఫు న్యాయవాది ఆరోపణలు చాలా తీవ్రమైనవని వాదించారు. రాష్ట్ర ప్రభుత్వం వ్యవహరిస్తున్న తీరుపైనా అనుమానాలు వ్యక్తం చేశారు. అయినప్పటికీ ధర్మాసనం తక్షణ విచారణకు అంగీకరించలేదు.

న్యాయవాది నరేంద్ర కుమార్ గోస్వామి వ్యక్తిగత హోదాలో ఈ పిటిషన్ దాఖలు చేశారు. రామజన్మభూమి తీర్థక్షేత్ర ట్రస్ట్‌కు వచ్చిన విరాళాలపై కోర్టు పర్యవేక్షణలో దర్యాప్తు జరపాలని కోరారు. ఫోరెన్సిక్ ఆడిట్ నిర్వహించాలని విజ్ఞప్తి చేశారు. విరాళాలకు సంబంధించిన రికార్డులు, సీసీటీవీ ఫుటేజీ, డిజిటల్ లాగ్‌లను భద్రపరచాలని కూడా కోరారు.

ప్రజా ఆలయాలకు వచ్చే విరాళాలు పవిత్రమైన ట్రస్ట్ ఆస్తిగా పరిగణించాలని పిటిషన్‌లో పేర్కొన్నారు. వాటి నిర్వహణలో పూర్తి పారదర్శకత, జవాబుదారీతనం ఉండాలని అన్నారు. దేశ ప్రాధాన్యమున్న ఆలయాల్లో విరాళాల నిర్వహణకు కనీస మార్గదర్శకాలు రూపొందించాలని కూడా సుప్రీంకోర్టును కోరారు.

ఇదిలా ఉండగా, ఈ కేసులో కొనసాగుతున్న దర్యాప్తు మరోవైపు వేగంగా సాగుతోంది. విరాళాల దుర్వినియోగం కేసులో అరెస్టైన ఎనిమిది మంది ఇళ్లలో పోలీసులు సోదాలు నిర్వహించారు. ఒక నిందితుడి ఇంటి నుంచి నగలు, పలు పత్రాలను స్వాధీనం చేసుకున్నారు. ట్రస్ట్ సభ్యుడి ఫిర్యాదు, ప్రత్యేక దర్యాప్తు బృందం (సిట్) ప్రాథమిక నివేదిక ఆధారంగా ఈ కేసు నమోదైంది.