నా గురించి చాలా మందికి ఆ విషయం తెలియదనుకుంటా: వైభవ్
- ట్రై సిరీస్ ఫైనల్లో చెలరేగిన యువ సంచలనం వైభవ్ సూర్యవంశీ
- 29 బంతుల్లో 94 పరుగులు.. 11 బంతుల్లోనే రికార్డ్ హాఫ్ సెంచరీ
- తనపై ఎలాంటి ఒత్తిడి లేదని, పక్కా ప్లాన్తో ఆడానని చెప్పిన వైభవ్
- తాను 50 ఓవర్ల క్రికెట్ కూడా చాలా ఆడానన్న యువ ఆటగాడు
- ఆ విషయం బహుశా చాలా మందికి తెలియకపోవచ్చని వెల్లడి
ఈ సిరీస్లో అంతకుముందు పేలవ ఫామ్తో ఇబ్బంది పడిన వైభవ్, కీలకమైన ఫైనల్లో మాత్రం తన సహజ శైలిలో ఆడి జట్టు విజయంలో కీలకపాత్ర పోషించాడు. సూర్యవంశీ ఆడిన ఈ మెరుపు ఇన్నింగ్స్ కారణంగా ఇండియా-ఏ తొలి 9 ఓవర్లలోనే 132 పరుగులు సాధించి భారీ స్కోరుకు బలమైన పునాది వేసుకుంది. అనంతరం నిర్ణీత ఓవర్లలో 9 వికెట్ల నష్టానికి 377 పరుగుల భారీ స్కోరు చేసింది. లక్ష్య ఛేదనలో శ్రీలంక-ఏ 47.1 ఓవర్లలో 311 పరుగులకు ఆలౌట్ అయింది.
ఫైనల్కు ముందు జరిగిన మ్యాచ్లో శ్రీలంక చేతిలోనే ఇండియా-ఏ సూపర్ ఓవర్లో ఓటమి పాలైంది. ఆ మ్యాచ్లో వైభవ్ ప్రత్యర్థి ఆటగాళ్లతో మైదానంలో వాగ్వాదానికి దిగడం కూడా చర్చనీయాంశమైంది. అటు ఫామ్ లేకపోవడం, ఇటు ప్రవర్తనపై విమర్శలు రావడంతో ఫైనల్లో అతనిపై తీవ్ర ఒత్తిడి ఉంటుందని అంతా భావించారు. అయితే, మ్యాచ్ అనంతరం వైభవ్ మాట్లాడుతూ తనపై ఎలాంటి ఒత్తిడి లేదని స్పష్టం చేశాడు.
"నాపై ఎలాంటి ఒత్తిడి లేదు. గత మ్యాచ్లలో నేను అనుకున్న ప్రణాళికలను సరిగ్గా అమలు చేయలేకపోయాను. కోచ్లతో చర్చించిన తర్వాత నా ఆటను సరిదిద్దుకున్నాను. ఈ సిరీస్లో ఎంతో నేర్చుకున్నాను" అని 'ప్లేయర్ ఆఫ్ ది మ్యాచ్' అవార్డు అందుకున్న అనంతరం వైభవ్ తెలిపాడు.
తనను కేవలం టీ20 ఆటగాడిగా చూడటంపై స్పందిస్తూ.. "నేను 50 ఓవర్ల క్రికెట్ కూడా చాలా ఆడాను. ఆ విషయం బహుశా చాలా మందికి తెలియకపోవచ్చు. విభిన్న పరిస్థితులకు అలవాటు పడటం ఒక సవాల్. దానిని స్వీకరించడం నాకు ఇష్టం" అని వివరించాడు. ఈ అద్భుత ప్రదర్శనతో తనపై వచ్చిన విమర్శలకు బ్యాట్తోనే వైభవ్ సమాధానం చెప్పాడు.
