ఇరాన్ వెళ్తున్న నౌకపై అమెరికా క్షిపణి దాడి.. ఇంజిన్‌ను ధ్వంసం చేసిన సైన్యం

గల్ఫ్ ఆఫ్ ఒమన్ సముద్ర జలాల్లో అమెరికా సైన్యం ఓ కార్గో నౌకపై క్షిపణి దాడి చేసింది. ఇరాన్‌పై అమలు చేస్తున్న నౌకా దిగ్బంధనాన్ని ఉల్లంఘించి, ఆ దేశ పోర్టు వైపు వెళ్తున్న ఈ నౌకను నిలిపివేసేందుకు ఈ చర్య తీసుకున్నట్లు అమెరికా సెంట్రల్ కమాండ్ వెల్లడించింది. పలుమార్లు హెచ్చరికలు జారీ చేసినా స్పందించకపోవడంతోనే దాడి చేసినట్లు తెలిపింది.

మే 29వ తేదీన ఈ ఘటన జరిగినట్లు సెంట్రల్ కమాండ్ అధికారికంగా ప్రకటించింది. గాంబియా జెండాతో ప్రయాణిస్తున్న నౌకకు 20కి పైగా హెచ్చరికలు పంపినట్లు పేర్కొంది. అయినప్పటికీ సిబ్బంది స్పందించకపోవడంతో, అమెరికా యుద్ధ విమానం నుంచి హెల్‌ఫైర్ క్షిపణిని ప్రయోగించి నౌక ఇంజిన్ రూమ్‌ను ధ్వంసం చేసినట్లు వివరించింది. ఈ దాడితో నౌక ముందుకు కదలలేని స్థితిలో నిలిచిపోయింది.

ఇరాన్‌తో కాల్పుల విరమణ ఒప్పందం అమల్లో ఉన్నప్పటికీ, ఆ దేశంపై అమెరికా కఠినమైన నౌకా దిగ్బంధనాన్ని కొనసాగిస్తోంది. ఈ దిగ్బంధనాన్ని ఉల్లంఘించే ప్రయత్నం చేసిన నౌకల్లో ఇది ఐదవదని తెలిపింది. ఇప్పటివరకు మొత్తం 116 నౌకలను దారి మళ్లించినట్లు సెంట్రల్ కమాండ్ తన ప్రకటనలో పేర్కొంది.