వరుసగా రెండోరోజు మార్కెట్ల పతనం.. భారీగా నష్టపోయిన సెన్సెక్స్, నిఫ్టీ

దేశీయ స్టాక్ మార్కెట్లు వరుసగా రెండో రోజు మంగళవారం కూడా భారీ నష్టాల్లో ట్రేడవుతున్నాయి. అంతర్జాతీయంగా నెలకొన్న ఉద్రిక్తతలు, ముడిచమురు ధరలు పెరగడం వంటి కారణాలతో సూచీలు అమ్మకాల ఒత్తిడికి గురయ్యాయి. ఉదయం ట్రేడింగ్‌లో సెన్సెక్స్, నిఫ్టీ రెండూ సుమారు 0.5 శాతానికి పైగా నష్టపోయాయి.

ట్రేడింగ్ ఆరంభంలో సెన్సెక్స్ 474 పాయింట్లు (0.62%) పతనమై 75,541 వద్ద ఇంట్రాడే కనిష్టానికి చేరింది. నిఫ్టీ 126 పాయింట్ల (0.53%) నష్టంతో 23,689 వద్ద కొనసాగుతోంది. ఈ ఉదయం సెన్సెక్స్ 326 పాయింట్ల నష్టంతో, నిఫ్టీ 93 పాయింట్ల నష్టంతో ప్రారంభమయ్యాయి. రంగాల వారీగా చూస్తే ఐటీ, కెమికల్స్, రియల్టీ, సిమెంట్, ఫైనాన్షియల్ సూచీలు 2 శాతానికి పైగా నష్టపోయాయి. ఇన్ఫోసిస్, టెక్ మహీంద్రా, టీసీఎస్, హెచ్‌సీఎల్ టెక్, విప్రో, ఎస్‍బీఐ లైఫ్, ఐసీఐసీఐ బ్యాంక్ వంటి షేర్లు ప్రధానంగా నష్టపోయిన వాటిలో ఉన్నాయి. దీనికి విరుద్ధంగా మెటల్, ఆయిల్ అండ్ గ్యాస్, పీఎస్‌యూ బ్యాంక్ రంగాలు మాత్రమే లాభాల్లో కొనసాగుతున్నాయి.

మార్కెట్ నిపుణుల విశ్లేషణ ప్రకారం, కొన్ని రంగాలపై ఈ ప్రతికూల ప్రభావం తక్కువగా ఉండొచ్చని తెలుస్తోంది. ఫార్మా రంగ ఉత్పత్తులకు డిమాండ్ స్థిరంగా ఉండటం, రూపాయి బలహీనపడటం వంటివి ఆ రంగానికి మేలు చేస్తాయని వారు అంచనా వేస్తున్నారు. ఎఫ్ఎంసీజీ రంగం కూడా నిలకడగా ఉండే అవకాశం ఉంది. మరోవైపు, ప్రైవేట్ పెట్టుబడులు పుంజుకుంటుండటంతో క్యాపిటల్ గూడ్స్ రంగం రానున్న రోజుల్లో రాణించవచ్చని విశ్లేషకులు భావిస్తున్నారు.

అంతర్జాతీయ మార్కెట్లో ముడిచమురు ధరలు పెరిగాయి. బ్రెంట్ క్రూడ్ బ్యారెల్ ధర 1.09% పెరిగి $105.35కి చేరగా, డబ్ల్యూటీఐ క్రూడ్ 1.23% పెరిగి $99.28 వద్ద ట్రేడవుతోంది. ఆసియా మార్కెట్లు మిశ్రమంగా స్పందించాయి. జపాన్, హాంకాంగ్ మార్కెట్లు లాభాల్లో ఉండగా, దక్షిణ కొరియా మార్కెట్ 2 శాతానికి పైగా నష్టపోయింది.