ఢిల్లీ గెలిచినా.. కెప్టెన్ అక్షర్ పటేల్‌కు మాత్రం షాక్!

ధర్మశాల వేదికగా పంజాబ్ కింగ్స్‌తో జరిగిన మ్యాచ్‌లో ఢిల్లీ క్యాపిటల్స్ (డీసీ) విజయం సాధించినప్పటికీ, ఆ జట్టు కెప్టెన్ అక్షర్ పటేల్‌కు జరిమానా తప్పలేదు. ఈ మ్యాచ్‌లో స్లో ఓవర్ రేట్ నమోదు చేసిన కారణంగా అక్షర్‌కు రూ. 12 లక్షల ఫైన్ విధిస్తున్నట్లు ఐపీఎల్ యాజమాన్యం ప్రకటించింది.

ఐపీఎల్ 2026 సీజన్‌లో ఢిల్లీ జట్టుకు స్లో ఓవర్ రేట్ కారణంగా ఇది తొలి తప్పిదం. దీంతో ఐపీఎల్ ప్రవర్తనా నియమావళి ప్రకారం కెప్టెన్ అక్షర్ పటేల్‌కు రూ. 12 లక్షల జరిమానా విధించినట్లు ఐపీఎల్ ఒక ప్రకటనలో పేర్కొంది. 

ఈ మ్యాచ్‌లో తొలుత బ్యాటింగ్ చేసిన పంజాబ్ కింగ్స్, ప్రియాన్ష్ ఆర్య, శ్రేయస్ అయ్యర్, సూర్యాన్ష్ షెడ్గే మెరుపులతో నిర్ణీత ఓవర్లలో 5 వికెట్లకు 210 పరుగుల భారీ స్కోరు సాధించింది. అనంతరం 211 పరుగుల లక్ష్యంతో బరిలోకి దిగిన ఢిల్లీ, 33 పరుగులకే 3 వికెట్లు కోల్పోయి కష్టాల్లో పడింది. అయితే, కెప్టెన్ అక్షర్ పటేల్ (30 బంతుల్లో 56), డేవిడ్ మిల్లర్ (51) అద్భుత భాగస్వామ్యంతో జట్టును ఆదుకున్నారు. చివర్లో మాధవ్ తివారీ (8 బంతుల్లో 18), అశుతోష్ శర్మ (10 బంతుల్లో 24) మెరుపు ఇన్నింగ్స్‌లతో 19వ ఓవర్లోనే ఢిల్లీ 216/7 స్కోరు చేసి విజయాన్ని అందుకుంది.

ఈ విజయంతో ఢిల్లీ క్యాపిటల్స్ తమ ప్లేఆఫ్ ఆశలను సజీవంగా ఉంచుకోగా, ఓటమి పాలైనప్పటికీ పంజాబ్ 13 పాయింట్లతో పట్టికలో నాలుగో స్థానంలో కొనసాగుతోంది.