స్కూటీ కాదు బీఎండబ్ల్యూ కారు... తల్లిదండ్రులను సర్ ప్రైజ్ చేసిన టెక్కీ

తల్లిదండ్రులకు ఓ టెక్కీ కొడుకు ఇచ్చిన సర్‌ప్రైజ్ గిఫ్ట్ ఇప్పుడు సోషల్ మీడియాలో అందరిని ఆకట్టుకుంటోంది. నాన్న కోసం స్కూటర్ కొంటున్నానని చెప్పి, వారిని ఏకంగా బీఎండబ్ల్యూ ఎక్స్1 లగ్జరీ కారు వద్దకు తీసుకెళ్లి ఆశ్చర్యపరిచాడు. ఈ భావోద్వేగభరిత క్షణాలకు సంబంధించిన వీడియో సోషల్ మీడియాలో వైరల్‌గా మారింది.

సిద్ధార్థ్ భదౌరియా అనే సాఫ్ట్‌వేర్ ఇంజనీర్, కంటెంట్ క్రియేటర్ ఈ సర్‌ప్రైజ్‌ను ప్లాన్ చేశాడు. "నాన్నకు స్కూటర్ గిఫ్ట్‌గా ఇస్తున్నానని అమ్మతో చెప్పాను. దీంతో ఆమె, 'డబ్బులు ఖర్చు చేస్తున్నావని నాన్న తిడతారేమో జాగ్రత్త' అని రెండు మూడు సార్లు హెచ్చరించింది. కానీ అసలు విషయం ఆమెకు తెలియదు కదా," అని వీడియోలో సిద్ధార్థ్ చెప్పడం చూడవచ్చు.

అనంతరం, తల్లిదండ్రులను ఒక పార్కింగ్ ఏరియాకు తీసుకెళ్లి, కారు కీని తన తండ్రి చేతిలో పెట్టాడు. ఆయన కీ బటన్ నొక్కగానే పక్కనే ఉన్న బీఎండబ్ల్యూ కారు హెడ్‌లైట్లు వెలిగాయి. మొదట అయోమయానికి గురైనప్పటికీ, ఆ లగ్జరీ కారే తమకు వచ్చిన బహుమతి అని గ్రహించి ఆనందంతో ఉబ్బితబ్బిబ్బయ్యారు. "ఇంత ఖరీదైన కారు ఎవరు కొంటారు?" అని తండ్రి ఆశ్చర్యంగా అడగ్గా, సిద్ధార్థ్ నవ్వుతూ బదులిచ్చాడు.

కారులో కూర్చున్న తర్వాత, "నేను ఈ కారులో కూర్చున్నానంటే ఇప్పటికీ నమ్మలేకపోతున్నాను. ఇది నిజంలా అనిపించడం లేదు," అని తల్లి భావోద్వేగానికి గురయ్యారు. "వారు నా కోసం సర్వస్వం ఇచ్చారు, ఈ రోజు నా వంతు," అనే క్యాప్షన్‌తో సిద్ధార్థ్ ఈ వీడియోను ఇన్‌స్టాగ్రామ్‌లో పంచుకున్నాడు. ఈ వీడియో చూసిన నెటిజన్లు, ఇది ప్రతి మధ్యతరగతి కుటుంబం కల అని, కొడుకు ప్రేమకు కంటతడి వచ్చిందని కామెంట్లు పెడుతున్నారు.