Vijay Deverakonda: దేశవ్యాప్తంగా ఆలయాల్లో విజయ్ దేవరకొండ, రష్మిక అన్నదానాలు

టాలీవుడ్ నూతన దంపతులు విజయ్ దేవరకొండ, రష్మిక మందన్న తమ పెళ్లి వేడుకలను అభిమానులతో కలిసి జరుపుకునేందుకు భారీ ఏర్పాట్లు చేశారు. తమ జీవితంలోని ఈ కొత్త ప్రయాణాన్ని పురస్కరించుకుని, మార్చి 1న (ఆదివారం) దేశవ్యాప్తంగా పలు ఆలయాల్లో అన్నదానం చేయనున్నట్లు ప్రకటించారు. అలాగే, దేశంలోని వివిధ నగరాలకు ట్రక్కుల నిండా స్వీట్లను పంపుతున్నట్లు తెలిపారు.

ఈ విషయాన్ని సోషల్ మీడియా ద్వారా పంచుకున్న విజయ్, రష్మిక.. "మీరందరూ ఎప్పుడూ మా ప్రయాణంలో, మా ప్రేమలో భాగమే. మన దేశంలో ఏ శుభకార్యమైనా భోజనం, మిఠాయిలతోనే జరుపుకుంటాం. అందుకే ఈ ఆనంద సమయంలో మీ అందరి ఆశీర్వాదాలు కోరుతూ స్వీట్లు పంచుతున్నాం" అని పేర్కొన్నారు. హైదరాబాద్, మహబూబ్ నగర్, కరీంనగర్, వైజాగ్, విజయవాడ, పుట్టపర్తితో పాటు ఢిల్లీ, ముంబై, చెన్నై, బెంగళూరు వంటి ప్రధాన నగరాల్లో ఈ స్వీట్ల పంపిణీ జరగనుంది.

మరోవైపు, వీరి వివాహాన్ని పురస్కరించుకుని వీరిద్దరూ జంటగా నటిస్తున్న పీరియాడిక్ చిత్రం 'రణబలి' నుంచి 'ఏందయ్యా సామి' అనే పెళ్లి పాట గ్లింప్స్‌ను చిత్రబృందం శనివారం విడుదల చేసింది. 1850ల నాటి వాస్తవ సంఘటనల ఆధారంగా తెరకెక్కుతున్న ఈ చిత్రంలో విజయ్ 'రణబలి' పాత్రలో, రష్మిక ఆయన భార్య 'జాయమ్మ'గా కనిపించనున్నారు. హాలీవుడ్ నటుడు ఆర్నాల్డ్ వోస్లూ (ది మమ్మీ ఫేమ్) ఇందులో విలన్ సర్‌ థియోడర్‌ హెక్టర్‌గా నటిస్తున్నారు. గీత గోవిందం, డియర్ కామ్రేడ్ తర్వాత, పెళ్లి చేసుకున్న అనంతరం వీరిద్దరూ జంటగా వెండితెరపై కనిపించబోయే మొదటి సినిమా ఇదే కావడం విశేషం.