Sree Vishnu: శ్రీవిష్ణు 'మృత్యుంజయ్' చిత్రంలో 'సీతా పరశురామ్'గా రెబా మోనికా జాన్

విలక్షణ నటుడు శ్రీవిష్ణు హీరోగా నటిస్తున్న తాజా థ్రిల్లర్ ‘మృత్యుంజయ్’. హుస్సేన్ షా కిరణ్ దర్శకత్వం వహిస్తున్న ఈ సినిమా నుంచి మేకర్స్ శనివారం ఓ కీలక అప్‌డేట్ ఇచ్చారు. ఈ చిత్రంలో హీరోయిన్‌గా నటిస్తున్న రెబా మోనికా జాన్ ఫస్ట్ లుక్ పోస్టర్‌ను విడుదల చేశారు. ఇందులో ఆమె ‘సీతా పరశురామ్’ అనే పోలీస్ అధికారి పాత్రలో కనిపించనున్నట్టు వెల్లడించారు.

ఈ పోస్టర్‌ను తన ఇన్‌స్టాగ్రామ్ ఖాతాలో పంచుకున్న రెబా మోనికా జాన్, "నీడల మధ్య యుద్ధం వివరాల్లో దాగి ఉంది. అప్పుడు దిగుతుంది సీతా పరశురామ్ వేటలోకి!" అని ఆసక్తికరమైన క్యాప్షన్ జోడించారు. ఇప్పటికే ప్రకటించినట్టుగా, ఈ చిత్రాన్ని ఈ నెల 27న ప్రపంచవ్యాప్తంగా థియేటర్లలో విడుదల చేసేందుకు నిర్మాతలు సన్నాహాలు చేస్తున్నారు.

గతంలో విడుదలైన ఈ సినిమా టైటిల్ టీజర్ ప్రేక్షకులలో అంచనాలను పెంచింది. అందులో శ్రీవిష్ణు ఓ ఖైదీగా కనిపిస్తుండగా, రెబా మోనికా జాన్ పోలీస్ ఆఫీసర్‌గా కనిపించడంతో కథపై క్యూరియాసిటీ నెలకొంది. "ప్రతీ క్లూ ముఖ్యమే. ప్రతీ అడుగు ప్రమాదకరమే. కానీ ఈ ఆటలో, ఎప్పుడు ముగించాలో జై నిర్ణయిస్తాడు" అంటూ గతంలో నిర్మాణ సంస్థ విడుదల చేసిన టీజర్ ట్యాగ్‌లైన్ సినిమా థ్రిల్లర్ నేపథ్యాన్ని స్పష్టం చేసింది.

లైట్ బాక్స్ మీడియా పతాకంపై సందీప్ గుణ్ణం, వినయ్ చిలకపాటి నిర్మిస్తున్న ఈ చిత్రాన్ని రమ్య గున్నం సమర్పిస్తున్నారు. ఈ చిత్రానికి కాలభైరవ సంగీతం అందిస్తుండగా, శ్రీకర్ ప్రసాద్ ఎడిటర్‌గా, విద్యాసాగర్ సినిమాటోగ్రాఫర్‌గా పనిచేస్తున్నారు.