రాయ్‌పూర్ వేదికగా జరుగుతున్న రెండో టీ20 మ్యాచ్‌లో న్యూజిలాండ్ జట్టు భారత్ ముందు భారీ లక్ష్యాన్ని ఉంచింది. టాస్ గెలిచి ఫీల్డింగ్ ఎంచుకున్న టీమిండియా నిర్ణయానికి కివీస్ బ్యాటర్లు తమ దూకుడైన ఆటతీరుతో సవాల్ విసిరారు. నిర్ణీత 20 ఓవర్లలో న్యూజిలాండ్ 6 వికెట్ల నష్టానికి 208 పరుగులు చేసింది.

బ్యాటింగ్‌కు దిగిన కివీస్‌కు మంచి ఆరంభం లభించింది. ఓపెనర్లు డెవాన్ కాన్వే (19), టిమ్ సీఫర్ట్ (24) వేగంగా పరుగులు సాధించారు. ఆ తర్వాత వచ్చిన రచిన్ రవీంద్ర (26 బంతుల్లో 44) విధ్వంసకర ఇన్నింగ్స్‌తో స్కోరు బోర్డును పరుగులు పెట్టించాడు. తన ఇన్నింగ్స్‌లో అతను 4 సిక్సర్లు, 2 ఫోర్లు బాదాడు. మధ్యలో గ్లెన్ ఫిలిప్స్ (19), డారిల్ మిచెల్ (18) పర్వాలేదనిపించారు.

అయితే, చివర్లో కెప్టెన్ మిచెల్ శాంట్నర్ చెలరేగాడు. కేవలం 27 బంతుల్లో 6 ఫోర్లు, ఒక సిక్సర్‌తో అజేయంగా 47 పరుగులు చేసి జట్టు స్కోరును 200 దాటించడంలో కీలక పాత్ర పోషించాడు.

భారత బౌలర్లలో స్పిన్నర్ కుల్దీప్ యాదవ్ 35 పరుగులిచ్చి 2 వికెట్లు తీసి ఆకట్టుకున్నాడు. హార్దిక్ పాండ్యా, హర్షిత్ రాణా, వరుణ్ చక్రవర్తి, శివమ్ దూబే తలో వికెట్ పడగొట్టారు. మరోవైపు, యువ పేసర్ అర్ష్‌దీప్ సింగ్ 4 ఓవర్లలో 53 పరుగులు సమర్పించుకుని ఖరీదైన బౌలర్‌గా నిలిచాడు.