Turkey: పాకిస్థాన్ కు టర్కీ ఆయుధ సాయం చేసిందా... అసలు విషయం ఇదే!
- పహల్గామ్ దాడి తర్వాత భారత్-పాక్ మధ్య ఉద్రిక్తతలు
- పాక్‌కు టర్కీ ఆయుధాలు పంపిందన్న మీడియా కథనాలు.
- ఈ వార్తలను పూర్తిగా ఖండించిన టర్కీ ప్రభుత్వం.
- ఇంధనం నింపుకోవడానికే తమ విమానం కరాచీలో ఆగిందని స్పష్టీకరణ
పహల్గామ్ ఉగ్రవాద దాడి అనంతరం భారత్, పాకిస్థాన్ మధ్య తీవ్ర ఉద్రిక్త పరిస్థితులు నెలకొన్నాయి. ఈ కీలక సమయంలో, పాకిస్థాన్‌కు తాము ఆయుధాలు సరఫరా చేసిందంటూ వచ్చిన వార్తలను టర్కీ ప్రభుత్వం తీవ్రంగా ఖండించింది. తమ సైనిక విమానం కేవలం ఇంధనం నింపుకోవడం కోసమే కరాచీలో ఆగిందని స్పష్టం చేసింది.
ఇటీవల పహల్గామ్ లో జరిగిన ఉగ్రదాడి నేపథ్యంలో ఇరు దేశాల మధ్య యుద్ధ మేఘాలు కమ్ముకున్నాయి. భారత్, పాకిస్థాన్ రెండూ సైనిక విన్యాసాలు నిర్వహిస్తున్నట్లు వార్తలు వెలువడుతున్నాయి. ఈ క్రమంలో, పాకిస్థాన్‌కు టర్కీ సైనిక సాయం అందించిందని, ఆయుధాలు, మందుగుండు సామగ్రితో కూడిన ఆరు టర్కీ సి-130ఇ హెర్క్యులస్ రవాణా విమానాలు కరాచీలో దిగాయని పలు మీడియా సంస్థలు కథనాలు ప్రచురించాయి.
అయితే, ఈ కథనాలను టర్కీ తీవ్రంగా ఖండించింది. టర్కీ అధ్యక్ష భవన కమ్యూనికేషన్స్ డైరెక్టరేట్ ఈ వార్తలను తోసిపుచ్చినట్లు 'టర్కియే టుడే' నివేదించింది. "పాకిస్థాన్‌కు టర్కీ ఆయుధాలతో కూడిన విమానాలను పంపిందంటూ మీడియాలో వస్తున్న వార్తల్లో ఎంతమాత్రం నిజం లేదు. టర్కీకి చెందిన కార్గో విమానం కేవలం ఇంధనం నింపుకోవడానికి మాత్రమే పాకిస్థాన్‌లో ఆగింది" అని టర్కిష్ అధికారులు ఒక సోషల్ మీడియా పోస్ట్ ద్వారా స్పష్టం చేశారు.
టర్కీ, పాకిస్థాన్ మధ్య దీర్ఘకాలంగా బలమైన మైత్రి, వ్యూహాత్మక సంబంధాలు ఉన్నాయి. గతంలో పలు అంతర్జాతీయ వేదికలపై టర్కీ అధ్యక్షుడు ఎర్డోగాన్ కశ్మీర్ అంశాన్ని ప్రస్తావించి పాకిస్థాన్‌కు మద్దతుగా నిలిచారు. అయితే, టర్కీ వ్యాఖ్యలను భారత్ తీవ్రంగా ఖండిస్తూ వస్తోంది. కశ్మీర్ తమ అంతర్గత వ్యవహారమని, అది భారతదేశంలో అంతర్భాగమని పలుమార్లు స్పష్టం చేసింది. తాజా పరిణామంలో, ఆయుధాల సరఫరా వార్తలను టర్కీ ఖండించడం గమనార్హం.
