ఫిబ్రవరి 17న అట్లూరి ప్రియతో నా కుమారుడి పెళ్లి: వైఎస్ షర్మిల

తన కుమారుడు రాజారెడ్డి వివాహానికి సంబంధించి వైఎస్సార్టీపీ అధ్యక్షురాలు వైఎస్ షర్మిల పూర్తి క్లారిటీ ఇచ్చారు. ఫిబ్రవరి 17న తన కుమారుడు రాజారెడ్డి వివాహం జరగనుందని ఆమె ప్రకటించారు. అట్లూరి ప్రియతో తన కుమారుడి పెళ్లి జరగనుందని చెప్పారు. ఈ నెల 18న రాజారెడ్డి, ప్రియల నిశ్చితార్థం జరగబోతోందని తెలిపారు. ఈ విషయాన్ని అందరితో పంచుకోవడం సంతోషంగా ఉందని చెప్పారు. రేపు కుటుంబ సమేతంగా కాబోయే వధూవరులతో కలిసి ఇడుపులపాయలోని వైఎస్సార్ ఘాట్ ను సందర్శిస్తామని తెలిపారు. తొలి వివాహ ఆహ్వాన పత్రికను నాన్న సమాధి వద్ద ఉంచి ఆయన ఆశీస్సులు తీసుకుంటామని చెప్పారు. ఈ మేరకు ఆమె ఎక్స్ వేదికగా పూర్తి వివరాలను తెలియజేశారు. మరోవైపు రాజారెడ్డి, అట్లూరి ప్రియలు ప్రేమలో ఉన్న సంగతి తెలిసిందే.