మారుతీ డిజైర్ ప్రియం.. రూ.7,500 వరకు పెరిగిన ధరలు

దేశంలో అత్యధికంగా అమ్ముడవుతున్న సెడాన్ కార్లలో ఒకటైన మారుతీ సుజుకీ డిజైర్ ధరలను కంపెనీ పెంచింది. కొన్ని వేరియంట్లపై రూ.7,500 వరకు పెంచినట్లు ప్రకటించింది. అయితే బేస్ మోడల్ LXI ధరలో ఎలాంటి మార్పు లేదు. కొత్త ధరల ప్రకారం VXI CNG, ZXI CNG వేరియంట్లపై అత్యధికంగా రూ.7,500 పెంపు అమలు కానుంది. దీంతో వాటి ఎక్స్‌షోరూమ్ ధరలు వరుసగా రూ.8.10 లక్షలు, రూ.9.11 లక్షలకు చేరాయి. పెట్రోల్ వేరియంట్లపై మాత్రం రూ.5,000 చొప్పున పెరిగాయి.

కొత్త ధరలు ఇవే..

• LXI – రూ.6.25 లక్షలు
• VXI – రూ.7.22 లక్షలు
• ZXI – రూ.8.22 లక్షలు
• ZXI+ – రూ.8.91 లక్షలు

మైలేజీ, ఇంజిన్ ప్రత్యేకతలు
డిజైర్‌లో 1.2 లీటర్ Z-సిరీస్ 3-సిలిండర్ పెట్రోల్ ఇంజిన్ ఉంటుంది. ఇది 82 హెచ్‌పీ పవర్, 112 ఎన్‌ఎం టార్క్‌ను ఉత్పత్తి చేస్తుంది. 5-స్పీడ్ మాన్యువల్, 5-స్పీడ్ AMT గేర్‌బాక్స్ ఎంపికలు అందుబాటులో ఉన్నాయి.

• మాన్యువల్ మోడల్ మైలేజీ – 24.79 కిమీ/లీటర్
• AMT మోడల్ మైలేజీ – 25.71 కిమీ/లీటర్
• CNG మోడల్ మైలేజీ – 33.73 కిమీ/కేజీ

భద్రతలోనూ ముందే
డిజైర్‌కు భారత్ NCAP 5-స్టార్ సేఫ్టీ రేటింగ్ లభించింది. 6 ఎయిర్‌బ్యాగ్‌లు, ABS, EBD, హిల్ హోల్డ్ అసిస్ట్, రివర్స్ పార్కింగ్ సెన్సర్లు వంటి భద్రతా ఫీచర్లు స్టాండర్డ్‌గా ఉన్నాయి.