మామూలు సండే తెలుసు... 'ఫ్రెంచ్ సండే' అంటే ఏంటో తెలుసా?

సాధారణంగా మనకు ఆదివారం ఎలా గడుస్తుంది? వారమంతా పేరుకుపోయిన బట్టలు ఉతకడం, ఇంట్లో మూలమూలలా పేరుకున్న దుమ్ము దులపడం, బంధువులు, స్నేహితులతో మాట్లాడటం.. ఇలాంటి సామాజిక బాధ్యతలతోనే సరిపోతుంది. అసలైన విశ్రాంతి కోసం ఎదురుచూసే ఆ ఒక్కరోజు కూడా మిగతా పనిదినాల్లాగే మరింత అలసటను మిగులుస్తుంది. మనకంటూ మనం కేటాయించుకోవాలనుకున్న సమయం కాస్తా ఆవిరైపోతుంది.

ఈ సమస్యకు ఫ్రెంచ్ ప్రజల దగ్గర ఒక చక్కటి పరిష్కారం ఉంది. దాని పేరే  'ఫ్రెంచ్ సండే'. ఆ రోజు ఏ పనీ చేయకుండా ప్రశాంతంగా, హాయిగా గడపడమే దీని ఉద్దేశం. ఫ్రాన్స్‌లో ఇది ఎప్పటినుంచో ఉన్న సంప్రదాయం అయినప్పటికీ, ఇప్పుడు ఇంటర్నెట్ పుణ్యమా అని ప్రపంచవ్యాప్తంగా పాప్యులర్ అవుతోంది. ఫ్రాన్స్‌లో నివసిస్తున్న పలువురు విదేశీయులు తమ అనుభవాలను సోషల్ మీడియాలో పంచుకుంటూ ఈ ట్రెండ్‌ను మరింత ప్రాచుర్యంలోకి తెస్తున్నారు.

ఏమిటీ 'ఫ్రెంచ్ సండే'?
దీనిని ఫ్రెంచ్ భాషలో "l’art de ne rien faire" అంటారు. అంటే, 'ఏ పనీ చేయకుండా ఉండే కళ' అని అర్థం. చాలామంది తమ సెలవు రోజున కూడా ఏదో ఒక పని పూర్తి చేయాలని ఒత్తిడికి గురవుతుంటే, ఫ్రాన్స్‌లో మాత్రం దీనికి పూర్తి భిన్నమైన వాతావరణం ఉంటుంది. ఆశ్చర్యకరంగా ఫ్రాన్స్‌లోని చాలా ప్రాంతాల్లో ఆదివారం దుకాణాలు కూడా మూసి ఉంటాయి. అంటే, కనీసం కిరాణా సామాను కొనడానికి కూడా అది సరైన రోజు కాదని వారి నమ్మకం.

ఈ రోజున మనసు, శరీరంపై మాత్రమే దృష్టి పెట్టాలి. మీకు నచ్చినప్పుడు నిద్రలేవాలి. వేడివేడి కాఫీ తాగుతూనో, ఇష్టమైన పుస్తకం చదువుతూనో సమయం గడపాలి. ఉదయం నెమ్మదిగా మధ్యాహ్నంలోకి జారుకుంటుంది. హడావిడి లేకుండా నెమ్మదిగా భోజనం చేస్తూ కబుర్లలో మునిగిపోవాలి. ఇదొక రకమైన సెల్ఫ్ కేర్ లాంటిదే, కానీ 10-స్టెప్స్ బ్యూటీ రొటీన్ అంత కఠినంగా కాదు.

'ఫ్రెంచ్ సండే'ను ఎలా పాటించాలి?
ఈ అనుభూతిని పొందడానికి ప్యారిస్‌లో ఉండాల్సిన అవసరం లేదు. మీరున్న చోటే దీన్ని ప్రయత్నించవచ్చు.
ప్రతి నిమిషాన్ని ఉత్పాదకంగా మార్చుకోవాలనే ఒత్తిడిని పక్కన పెట్టండి.
మీ శరీరం ఏం చెబితే అది వినండి. మధ్యాహ్నం నిద్రలేచినా, మళ్లీ కాసేపు కునుకు తీయాలనిపిస్తే తీయండి.
పుస్తకం, సంగీతం, లేదా మీకు నచ్చిన ఏదైనా పనితో ఎక్కువ సమయం గడపండి.
ముఖ్యంగా మీ డివైజ్‌లను ఎంత దూరంగా ఉంచితే అంత మంచిది. గంటల తరబడి ఫోన్‌లో స్క్రోలింగ్ చేయడం ఈ కోవలోకి రాదు.
'ఫ్లానర్' అనే ఫ్రెంచ్ పదాన్ని ఆచరణలో పెట్టండి. అంటే, ఎలాంటి గమ్యం లేకుండా నెమ్మదిగా నడకకు వెళ్లడం.
ఏమీ చేయనందుకు అపరాధభావం లేకుండా మీ మనసును స్వేచ్ఛగా వదిలేయండి.

అయితే, దీని అర్థం స్నేహితులను కలవకూడదని, ఇంటి పనులు చేయకూడదని కాదు. ఆ పనులు మీకు ఆనందాన్ని ఇస్తాయనుకుంటే, అవి మీకు భారంగా అనిపించకపోతే మాత్రమే చేయాలి.

ఇది బర్న్‌అవుట్‌కు పరిష్కారమా?
ఇది పూర్తిగా వ్యక్తిగతమైన విషయం. ఈ సంప్రదాయం వెనుక ఉన్న ముఖ్య ఉద్దేశం మనతో మనం, మన సన్నిహితులతో నాణ్యమైన సమయాన్ని గడపడం. ఇది మన జీవితాన్ని మార్చే మంత్రదండం కాకపోవచ్చు, సోమవారం రాకుండా ఆగదు. కానీ, రోజురోజుకీ పెరుగుతున్న పని ఒత్తిడి, బర్న్‌అవుట్ లాంటి సమస్యల మధ్య, 'ఫ్రెంచ్ సండే' మనకు ఒక చిన్న విరామాన్ని ఇస్తుంది. జీవితాన్ని కాస్త నెమ్మదిగా, మరింత మానవీయంగా ఆస్వాదించే అవకాశాన్ని కల్పిస్తుంది. ఈ విషయం మనందరికీ తెలిసిందే అయినా, నిజంగా ఎంతమంది పాటిస్తున్నాం?