విజయ్ ఆంటోనీ 'అప్ప కుట్టి' రిలీజ్ డేట్ ఫిక్స్!

నటుడు, సంగీత దర్శకుడు విజయ్ ఆంటోనీ కథానాయకుడిగా నటిస్తున్న తాజా చిత్రం 'అప్ప కుట్టి' విడుదల తేదీ ఖరారైంది. ఈ సినిమాను అక్టోబర్ 16న ప్రపంచవ్యాప్తంగా థియేటర్లలో విడుదల చేయనున్నట్లు చిత్రబృందం అధికారికంగా ప్రకటించింది. ఈ మేరకు విజయ్ ఆంటోనీ సోషల్ మీడియా వేదికగా విడుదల తేదీతో కూడిన పోస్టర్‌ను పంచుకున్నాడు.

ము. మారన్ దర్శకత్వం వహిస్తున్న ఈ చిత్రాన్ని పక్కా యాక్షన్ ఫ్యామిలీ డ్రామాగా తెరకెక్కిస్తున్నారు. తండ్రీకూతుళ్ల మధ్య ఉండే బలమైన అనుబంధం, భావోద్వేగాల నేపథ్యంలో ఈ సినిమా కథ సాగుతుంది. ఇందులో యాక్షన్ సన్నివేశాలకు కూడా అధిక ప్రాధాన్యం ఉన్నట్లు తెలుస్తోంది. "గాయపడిన ముఖం.. భరోసా ఇచ్చే భుజం.. కొన్నిసార్లు ప్రేమ ఇలాగే కనిపిస్తుంది" అంటూ గతంలో విడుదల చేసిన ఫస్ట్ లుక్ పోస్టర్ సినిమాపై ఇప్పటికే ఆసక్తిని పెంచింది.

ఈ చిత్రంలో విజయ్ ఆంటోనీ నటనతో పాటు సంగీతం, ఎడిటింగ్ బాధ్యతలను కూడా స్వయంగా నిర్వహిస్తుండటం విశేషం. ప్రీతి అస్రానీ, లితాన్య, భగవతి పెరుమాళ్, హరిప్రియ ఇసై, అరువి మదన్ తదితరులు కీలక పాత్రలు పోషిస్తున్నారు. రాజీవ్ రాజేంద్రన్ సినిమాటోగ్రఫీ అందిస్తున్నాడు. వాస్తవానికి ఈ చిత్రాన్ని ఆగస్టులోనే విడుదల చేయాలని భావించినప్పటికీ, కొన్ని కారణాల వల్ల అక్టోబర్‌కు వాయిదా వేశారు.