Pawan Kalyan: ఉస్తాద్ ఊచకోత షురూ.. మరోసారి ఖాకీ డ్రెస్సులో పవర్ స్టార్

గబ్బర్ సింగ్ చిత్రంతో పవర్ స్టార్ పవన్ కల్యాణ్ కు ఇండస్ట్రీ హిట్ అందించిన దర్శకుడు హరీశ్ శంకర్. ఆ సినిమా తర్వాత ఈ ఇద్దరి కాంబినేషన్లో వస్తున్న మరో చిత్రం ‘ఉస్తాద్ భగత్ సింగ్’. చాన్నాళ్ల కిందటే ఈ చిత్రాన్ని ప్రకటించినా షూటింగ్ ఆలస్యం అవుతూ వస్తోంది. అయితే, ఎట్టకేలకు ఈ సినిమా చిత్రీకరణ నిన్న హైదరాబాద్ లో ప్రారంభం అయింది. హైదరాబాద్ శివారులోని అల్యూమినియం ఫ్యాక్టరీలో మొదట ఒక ఫైట్ సీన్ చిత్రీకరిస్తున్నట్టు తెలుస్తోంది. 

షూటింగ్ మొదలైన విషయాన్ని నిర్మాణ సంస్థ మైత్రీ మూవీ మేరర్స్ ప్రకటించింది. ఉస్తాద్ ఊచకోత షురూ అంటూ ఓ పోస్టర్ ను సైతం ట్విట్టర్ లో పంచుకుంది. ఇందులో పవర్ స్టార్ పవన్ ఖాకీ డ్రెస్సులో పోలీస్ స్టేషన్ లో కుర్చీలో కూర్చొని ఓ చేత్తో తుపాకీ, మరో చేతిలో టీ గ్లాసు పట్టుకొని ఉండగా వెనుక నుంచి తీసిన ఫొటోను షేర్ చేసింది. ఈ సినిమాకు మరో దర్శకుడు దశరథ్ స్క్రీన్ ప్లే, కథ అందిస్తున్నారు. ఈ చిత్రంతో పాటు క్రిష్ దర్శకత్వంలో 'హరిహర వీరమల్లు', యువ దర్శకుడు సుజిత్ సినిమాకు కూడా పవన్ ఓకే చెప్పారు.