ఆమె కోసం ఆ సినిమాను 38 సార్లు చూశాను: నవీన్ చంద్ర  

'దండుపాళ్యం' సినిమాకి ఒక ప్రత్యేకత ఉంది. క్రైమ్ థ్రిల్లర్ నేపథ్యంలో సాగే ఈ సినిమా ఒక వర్గం ప్రేక్షకుల ఆదరణ పొందింది. అప్పటి నుంచి ఈ సిరీస్ లో రకరకాల క్రైమ్ కథలు ప్రేక్షకులను పలకరిస్తూ వస్తున్నాయి. అలా ఆ సిరీస్ లో 'తగ్గేదే లే' అనే టైటిల్ తో మరో సినిమా థియేటర్లకు రావడానికి రెడీ అవుతోంది. భద్ర ప్రొడక్షన్స్ బ్యానర్ పై నిర్మితమైన ఈ సినిమాలో నవీన్ చంద్ర కథానాయకుడిగా నటించగా, ఆయన సరసన నాయికలుగా దివ్య పిళ్లై - అనన్య కనిపించనున్నారు. 

శ్రీనివాసరాజు దర్శకత్వం వహించిన ఈ సినిమా, ఈ నెల 4వ తేదీన ప్రేక్షకుల ముందుకు రానుంది. ఈ నేపథ్యంలో ఈ సినిమా ప్రీ రిలీజ్ ఈవెంట్ హైదరాబాదు 'దసపల్లా కన్వెన్షన్' లో నిర్వహించారు. హీరో హీరోయిన్స్ తో పాటు ఈ సినిమాలో కీలకమైన పాత్రలను పోషించిన మకరంద్ దేశ్ పాండే ..  రవి కాలే .. పూజా గాంధీ కూడా హాజరయ్యారు. ఈ సినిమాలో తమ పాత్రల ప్రాధాన్యతను గురించి చెప్పారు. ప్రతి ఐదు నిమిషాలకి ఒక ట్విస్ట్ ఉండటం ఈ సినిమా ప్రత్యేకత అని చెప్పారు.

నవీన్ చంద్ర మాట్లాడుతూ .. " ఈ సినిమా షూటింగు ఫస్టు లాక్ డౌన్ .. సెకండ్ లాక్ డౌన్ సమయంలో జరిగింది. ఆ సమయంలో టీమ్ లో ఎవరికీ కూడా పనిలేదు. అయినా ఈ సినిమా నిర్మాతలు రెండు షెడ్యూల్స్ కు సంబంధించిన పేమెంటును ముందుగానే ఇచ్చారు. ఇది వాళ్ల మంచి మనసుకు నిదర్శనం. ఒక వైపున దండుపాళ్యం గ్యాంగ్ .. మరో వైపున లవ్ స్టోరీ నడవడం ఈ సినిమాపై ఆసక్తిని రేకెత్తించే ప్రధానమైన అంశం. ఈ సినిమాలో కీలకమైన రోల్ చేసిన 'పూజా గాంధీ గారికి నేను వీరాభిమానిని. ఆమె హీరోయిన్ గా కన్నడలో చేసిన 'ముంగారు మలే' సినిమాను 38 సార్లు చూశాను. అలాంటి ఆర్టిస్ట్ తో కలిసి నటించడం నా అదృష్టంగా భావిస్తున్నాను" అంటూ చెప్పుకొచ్చాడు.