'సీతా రామం' ప్రీ రిలీజ్ ఈవెంట్ రేపే!

దుల్కర్ సల్మాన్ .. మృణాల్ ఠాకూర్ జంటగా 'సీతా రామం' సినిమా రూపొందింది. అశ్వనీ దత్ నిర్మించిన ఈ సినిమాకి, హను రాఘవపూడి దర్శకత్వం వహించాడు. 'యద్ధంతో రాసిన ప్రేమకథ' అనే ట్యాగ్ లైన్  తో ఈ సినిమా ప్రేక్షకులను పలకరించనుంది. ఈ నెల 5వ తేదీన ఈ సినిమాను విడుదల చేయనున్నారు. దాంతో ప్రమోషన్స్ ఊపందుకున్నాయి. 

ఈ నేపథ్యంలో ఈ సినిమా ప్రీ రిలీజ్ ఈవెంట్ ను రేపు ప్లాన్ చేశారు. రేపు రాత్రి 7 గంటలకు ఈ వేడుక మొదలుకానుంది. ఇందుకు సంబంధించిన అధికారిక పోస్టర్ ను కొంతసేపటి క్రితం రిలీజ్ చేశారు. ఇంతవరకూ మరాఠీ సినిమాలను ఎక్కువగా చేస్తూ వచ్చిన మృణాల్ ఠాకూర్, ఈ సినిమాతో తెలుగు తెరకి పరిచయమవుతోంది.

విశాల్ చంద్రశేఖర్ సంగీతాన్ని సమకూర్చిన ఈ సినిమాలో రష్మిక కీలకమైన పాత్రను పోషించింది. ఇతర ముఖ్యమైన పాత్రల్లో భూమిక .. సుమంత్ .. తరుణ్ భాస్కర్ కనిపించనున్నారు. ప్రేమకథల స్పెషలిస్టుగా హను రాఘవపూడికి మంచి పేరు ఉంది. మరి ఈ లవ్ స్టోరీ యూత్ ను ఏ స్థాయిలో మెప్పిస్తుందన్నది చూడాలి.