తెలంగాణ‌లోని గ్రామాల‌ను చూసి ఇత‌ర రాష్ట్రాల వారు ఆశ్చ‌ర్య‌పోతున్నారు: కేసీఆర్

01-10-2021 Fri 11:19
  • గ‌త ప్ర‌భుత్వాల హ‌యాంలో స‌ర్పంచులకు ఎన్నో ఇబ్బందులు
  • ఇప్పుడు స‌ర్పంచుల‌కు ఎలాంటి ఇబ్బందులూ లేవు
  • గ్రామాల్లో ప్ర‌జ‌లకు అన్ని సౌక‌ర్యాలు క‌ల్పిస్తున్నామ‌న్న కేసీఆర్
  • అసెంబ్లీలో కాంగ్రెస్ పార్టీ వాయిదా తీర్మానం
kcr slams congress

తెలంగాణ‌లోని గ్రామాల‌ను చూసి ఇత‌ర రాష్ట్రాల్లోని గ్రామాల ప్ర‌జ‌లు ఆశ్చ‌ర్య‌పోతున్నార‌ని ముఖ్య‌మంత్రి కేసీఆర్ అన్నారు. ఈ రోజు ఆయ‌న తెలంగాణ అసెంబ్లీలో మాట్లాడుతూ... గ‌త ప్ర‌భుత్వాల హ‌యాంలో స‌ర్పంచులు ఎన్నో ఇబ్బందులు ప‌డ్డార‌ని ఆయ‌న చెప్పారు. త‌మ ప్ర‌భుత్వ పాల‌న‌లో స‌ర్పంచుల‌కు ఎలాంటి ఇబ్బందులూ లేవ‌ని చెప్పుకొచ్చారు. రాష్ట్రంలో స‌ర్పంచులు గౌర‌వంగా బ‌తుకుతున్నార‌ని చెప్పారు. గ్రామాల్లో ప్ర‌జ‌లకు అన్ని సౌక‌ర్యాలు క‌ల్పిస్తున్నామ‌ని చెప్పారు.

కాగా, తెలంగాణ అసెంబ్లీలో కాంగ్రెస్ పార్టీ వాయిదా తీర్మానాన్ని ప్ర‌వేశ‌పెట్టింది. తెలంగాణ‌లో గులాబ్ తుపాను ప్ర‌భావంతో కురిసిన భారీ వర్షాలకు పంట నష్టం వాటిల్లింద‌ని కాంగ్రెస్ తెలిపింది. న‌ష్ట‌పోయి స‌మ‌స్య‌ల్లో ప‌డ్డ‌ రైతులను ఆదుకోవడంలో ప్రభుత్వం పూర్తిగా విఫలమైంద‌ని పేర్కొంది. రాష్ట్రంలో రైతులు ఆత్మహత్యలకు పాల్పడుతున్నారని, అసెంబ్లీలో ఆ అంశాల‌ని చర్చించాలని కాంగ్రెస్ కోరింది. అంత‌కు ముందు శాస‌న‌స‌భ‌లో స్పీకర్ పోచారం శ్రీనివాస్ రెడ్డి ప్రశ్నోత్త‌రాలు ప్రారంభించారు. స‌భ్యులు అడిగిన ప్ర‌శ్న‌ల‌కు హ‌రీశ్ రావుతో పాటు ప‌లువురు మంత్రులు స‌మాధానం ఇచ్చారు.