Afghanistan: తాలిబన్ల దారుణం.. కుటుంబసభ్యుల ముందే గర్భిణి కాల్చివేత

తాము మారామని తాలిబన్లు చెపుతున్నప్పటికీ... వారు చేస్తున్న కిరాతకాల వల్ల వారు మారారని ఎవరూ నమ్మేలేని పరిస్థితి నెలకొంది. ముఖ్యంగా మహిళలపై వారు చేస్తున్న దురాగతాలు అత్యంత దారుణంగా ఉంటున్నాయి. తాజాగా ఆరు నెలల గర్భిణి అయిన ఓ మహిళా పోలీసును అత్యంత దారుణంగా కాల్చి చంపారు. బుర్ఖా వేసుకోలేదనే కారణంతో ఆమెను తాలిబన్లు చంపేయడం గమనార్హం. ఇంకా విషాదకరమైన విషయం ఏమిటంటే ఆమె భర్త, పిల్లలు, కుటుంబసభ్యుల ముందే ఆమెను దారుణంగా చంపేశారు.

గతంలో తాలిబన్లు పాలన కొనసాగించినప్పుడు మహిళలపై దారుణమైన ఆంక్షలు విధించారు. ముఖం దగ్గర నుంచి పాదాల వరకు ఏ శరీర భాగం కనపడకుండా మహిళలు బుర్ఖాలు ధరించేవారు. అయితే, గత రెండు దశాబ్దాలుగా వారు పూర్తి స్వేచ్ఛను అనుభవిస్తున్నారు. ఇప్పుడు మళ్లీ తాలిబన్ల పాలన రావడంతో పాత పరిస్థితులు మళ్లీ మొదలయ్యాయి. గర్భిణి అని కూడా చూడకుండా సదరు మహిళను అత్యంత కిరాతకంగా చంపేయడం అందరినీ షాక్ కు గురి చేస్తోంది.