ఫిల్మ్ ఛాంబర్‌కు గిరిబాబు భౌతికకాయం.. కన్నీటిపర్యంతమైన అన్నపూర్ణమ్మ

తెలుగు సినీ పరిశ్రమలో ఐదు దశాబ్దాల పాటు తన నటనతో అలరించిన సీనియర్ నటుడు, దర్శకుడు, నిర్మాత గిరిబాబు శనివారం కన్నుమూసిన సంగతి తెలిసిందే. ఆయన భౌతికకాయాన్ని సినీ ప్రముఖులు, అభిమానుల సందర్శనార్థం హైదరాబాద్‌లోని తెలుగు ఫిల్మ్ ఛాంబర్‌కు తరలించారు.

శనివారం రాత్రి 9 గంటల వరకు ఆయన భౌతికకాయాన్ని ఫిల్మ్ ఛాంబర్‌లోనే ఉంచనున్నారు. ఈ సందర్భంగా సినీ పరిశ్రమకు చెందిన ప్రముఖులు, అభిమానులు పెద్ద సంఖ్యలో అక్కడికి చేరుకుని ఆయనకు కడసారి వీడ్కోలు పలుకుతున్నారు. ఇప్పటికే నటులు తనికెళ్ల భరణి, రావు రమేశ్, శివాజీ రాజా తదితర ప్రముఖులు ఫిల్మ్ ఛాంబర్‌కు చేరుకుని గిరిబాబు పార్థివదేహానికి ఘనంగా నివాళులర్పించారు. ఆయన కుటుంబ సభ్యులను పరామర్శించి తమ ప్రగాఢ సానుభూతిని తెలియజేశారు.

సీనియర్ నటి అన్నపూర్ణమ్మ కూడా గిరిబాబు భౌతిక కాయానికి నివాళులు అర్పించారు. ఈ సందర్భంగా ఆమె కన్నీటి పర్యంతమయ్యారు. గిరిబాబు ఎంతో ఆత్మీయుడని తెలిపారు. కొంతకాలం కిందట గిరిబాబు భార్యను కోల్పోయి ఒంటరితనంతో బాధపడ్డారని తెలిపారు. ఆయనతో తనకు ఎంతో స్నేహం ఉందని.. స్నేహానికి ఆడా, మగా తేడా ఉండదని.. స్నేహం అంటే స్నేహమేనని అన్నపూర్ణమ్మ అన్నారు.

అంతకుముందు, గిరిబాబు కుమారుడు రఘుబాబు తీవ్ర భావోద్వేగాలకు లోనయ్యారు. అన్నపూర్ణమ్మను తన తండ్రి గిరిబాబు "అమ్మాయ్ అన్నపూర్ణా" అని పిలుస్తారని గుర్తుచేసుకుని కంటతడిపెట్టారు.

గిరిబాబు అంత్యక్రియలు ఆదివారం (నవంబర్ 15) మధ్యాహ్నం ఆయన స్వగ్రామమైన ప్రకాశం జిల్లా రావినూతలలో జరుగుతాయని రఘుబాబు వెల్లడించారు.

గత కొంతకాలంగా అనారోగ్య సమస్యలతో బాధపడుతున్న గిరిబాబు, హైదరాబాద్‌లోని ఒక ప్రైవేట్ ఆసుపత్రిలో కొంతకాలంగా చికిత్స పొందుతున్నారు. ఆరోగ్య పరిస్థితి విషమించడంతో నేడు (నవంబర్ 14) ఆయన తుదిశ్వాస విడిచారు. ఆయన మృతితో తెలుగు చలనచిత్ర పరిశ్రమలో విషాదం నెలకొంది.