బంగాళాఖాతంలో రేపు అల్పపీడనం.. 15 నాటికి వాయుగుండం!

బంగాళాఖాతంలో మరో కీలక వాతావరణ మార్పు చోటుచేసుకుంటోంది. దక్షిణ అండమాన్ సముద్రం, దాని పరిసర ప్రాంతాల్లో కొనసాగుతున్న ఉపరితల ఆవర్తనం ప్రభావంతో నవంబర్ 13 నాటికి ఆగ్నేయ బంగాళాఖాతంలో అల్పపీడనం ఏర్పడే అవకాశం ఉందని భారత వాతావరణ శాఖ (IMD), చెన్నై ప్రాంతీయ వాతావరణ కేంద్రం (RMC) వెల్లడించాయి. 

వాతావరణ శాఖ అంచనాల ప్రకారం, ఈ అల్పపీడనం వాయవ్య దిశగా కదులుతూ నవంబర్ 14 నాటికి తీవ్ర అల్పపీడనంగా బలపడుతుంది. ఆ తర్వాత నవంబర్ 15 నాటికి అదే ప్రాంతంలో మరింత కేంద్రీకృతమై వాయుగుండం (డిప్రెషన్)గా మారే అవకాశాలు ఉన్నాయి. ప్రస్తుతం సముద్ర ఉపరితల ఉష్ణోగ్రతలు అనుకూలంగా ఉండటంతో ఇది మరింత బలపడే అవకాశం ఉన్నప్పటికీ, తుపానుగా మారుతుందా లేదా అనేదానిపై అధికారులు నిరంతరం పర్యవేక్షిస్తున్నారు.

ఈ వ్యవస్థ కదలికల విషయంలో వాతావరణ మోడల్స్ భిన్నమైన సంకేతాలు ఇస్తున్నాయి. ఇది తమిళనాడు, ఆంధ్రప్రదేశ్ తీరాల వైపు దూసుకువస్తుందా? లేక ఈశాన్య దిశగా మలుపు తీసుకుని మయన్మార్ వైపు వెళుతుందా? అనే అంశంపై ఒకటి రెండు రోజుల్లో పూర్తి స్పష్టత రానుంది.

ప్రస్తుతానికి మన్నార్ సింధుశాఖ పరిసరాల్లో ఉన్న ఉపరితల ఆవర్తనం కారణంగా తమిళనాడులోని దక్షిణ ప్రాంతాలు, డెల్టా జిల్లాల్లో ఓ మోస్తరు వర్షాలు కురుస్తున్నాయి. నవంబర్ 15 తర్వాత వర్షాలు ఉత్తర తమిళనాడు వైపు విస్తరించే సూచనలు ఉన్నాయి. నవంబర్ నెలలో సాధారణ వర్షపాతం లోటుతో ఇబ్బంది పడుతున్న కావేరి డెల్టా సహా ఉత్తర తీర జిల్లాలకు ఈ వర్షాలు ఎంతో ఊరటనిస్తాయని అధికారులు భావిస్తున్నారు.

ఈ వాతావరణ వ్యవస్థ ప్రభావంతో అండమాన్ సముద్రం, ఆగ్నేయ బంగాళాఖాతంలో వాతావరణం ప్రమాదకరంగా మారనుంది. నవంబర్ 14, 15 తేదీల్లో సముద్రంలో గంటకు 40 నుంచి 50 కిలోమీటర్ల వేగంతో, గరిష్ఠంగా 60 కిలోమీటర్ల వేగంతో బలమైన ఈదురుగాలులు వీచే అవకాశం ఉంది. సముద్రం అల్లకల్లోలంగా మారనున్నందున మత్స్యకారులు వేటకు వెళ్లరాదని వాతావరణ కేంద్రం హెచ్చరించింది. సముద్రంలో ఉన్నవారు వెంటనే తీరానికి తిరిగి రావాలని స్పష్టం చేసింది. ఈ వ్యవస్థ గమనాన్ని బట్టి ఎప్పటికప్పుడు తాజా సమాచారాన్ని అందిస్తామని అధికారులు తెలిపారు.