సోనియా గాంధీ జీవితంపై సినిమా.. నిర్మాతలుగా కాంగ్రెస్ కార్యకర్తలు: జగ్గారెడ్డి సంచలన ప్రకటన

కాంగ్రెస్ పార్టీ అగ్ర నాయకురాలు సోనియా గాంధీ జీవితాన్ని వెండితెరపై ఆవిష్కరించనున్నట్లు టీపీసీసీ వర్కింగ్ ప్రెసిడెంట్, ఎమ్మెల్యే జగ్గారెడ్డి సంచలన ప్రకటన చేశారు. సోనియా గాంధీ ఆత్మకథ 'బిలాంగింగ్: ఎ జర్నీ ఆఫ్ లవ్' ఆధారంగా ఈ చిత్రాన్ని నిర్మించనున్నట్లు ఆయన స్పష్టం చేశారు. ఈ సినిమాకు సంగారెడ్డి నియోజకవర్గంలోని కాంగ్రెస్ నాయకులు, కార్యకర్తలే నిర్మాతలుగా వ్యవహరిస్తారని చెప్పడం విశేషం.

బుధవారం సంగారెడ్డిలో తన కుమారుడి వివాహ వేడుకకు సంబంధించి ఏర్పాటు చేసిన కాంగ్రెస్ ముఖ్య నేతల సమావేశంలో జగ్గారెడ్డి ఈ ఆసక్తికర విషయాన్ని వెల్లడించారు. సోనియా గాంధీ జీవితంలోని త్యాగాలు, కష్టాలు, రాజకీయ ప్రయాణాన్ని ప్రజలకు తెలియజేయాలన్నదే తన లక్ష్యమని ఆయన అన్నారు. "ఇందిరాగాంధీ కోడలిగా, రాజీవ్ గాంధీ భార్యగా, రాహుల్, ప్రియాంకల తల్లిగా ఆమె ప్రయాణాన్ని సినిమాలో చూపిస్తాం. ఆమెది విజయవంతమైన రాజకీయ జీవితం" అని జగ్గారెడ్డి వివరించారు.

ప్రధాని పదవిని చేపట్టే అవకాశం మూడుసార్లు వచ్చినా సోనియా గాంధీ దాన్ని తృణప్రాయంగా వదులుకున్నారని, అది ఒక చారిత్రక ఘట్టమని జగ్గారెడ్డి కొనియాడారు. భర్త మరణానంతరం పీవీ నరసింహారావును, యూపీఏ హయాంలో మన్మోహన్ సింగ్‌ను ప్రధానులను చేసిన ఆమె నిస్వార్థ రాజకీయానికి ఇది నిదర్శనమని అన్నారు. "సముద్రమంత లోతైన కాంగ్రెస్ రాజకీయ వ్యవస్థను పూర్తిగా అధ్యయనం చేసిన గొప్ప నాయకురాలు సోనియా. ప్రధాని కుర్చీపై ఆమెకు ఎలాంటి వ్యామోహం లేదు. రాహుల్ గాంధీ ప్రధాని కావాలన్నదే ఆమె కోరిక" అని జగ్గారెడ్డి పేర్కొన్నారు.

ఈ సినిమా నిర్మాణ ప్రక్రియను పర్యవేక్షించేందుకు 50 మందితో ఒక కమిటీని ఏర్పాటు చేయనున్నట్లు, దానికి గాంధీభవన్ పీఆర్‌వో హరిప్రసాద్ పర్యవేక్షకులుగా ఉంటారని తెలిపారు. త్వరలోనే ముఖ్యమంత్రి రేవంత్ రెడ్డి, టీపీసీసీ అధ్యక్షుడు మహేశ్ కుమార్ గౌడ్ చేతుల మీదుగా క్లాప్ కొట్టించి షూటింగ్ ప్రారంభిస్తామని జగ్గారెడ్డి స్పష్టం చేశారు. పార్టీ నాయకులంతా ఈ బృహత్కార్యానికి ఆర్థికంగా సిద్ధం కావాలని ఆయన పిలుపునిచ్చారు.