అమెరికాలో దీపావళికి అధికారిక సెలవు.. ప్రతినిధుల సభలో కీలక ముందడుగు

అమెరికాలో దీపావళి పండుగకు ఫెడరల్ హాలిడే (అధికారిక జాతీయ సెలవు) ప్రకటించాలని కోరుతూ యూఎస్ చట్టసభలో మరోసారి బిల్లును ప్రవేశపెట్టారు. కాంగ్రెస్ సభ్యురాలు గ్రేస్ మెంగ్ నేతృత్వంలోని పలువురు చట్టసభ సభ్యులు 'దీపావళి డే యాక్ట్' పేరుతో ఈ బిల్లును ప్రతినిధుల సభలో పునఃప్రవేశపెట్టారు. ఈ బిల్లుకు ఐదుగురు భారత సంతతి ప్రతినిధులు రాజా కృష్ణమూర్తి, సుహాస్ సుబ్రహ్మణ్యం, శ్రీ థానేదార్, రో ఖన్నా, అమీ బేరాతో పాటు మొత్తం 19 మంది కాంగ్రెస్ సభ్యులు మద్దతు తెలిపారు.

కాంగ్రెషనల్ ఏషియన్ పసిఫిక్ అమెరికన్ కాకస్ చైర్‌గా ఉన్న గ్రేస్ మెంగ్ ఈ సందర్భంగా మాట్లాడుతూ.. ఈ చట్టం ద్వారా దీపావళి ప్రాముఖ్యత గురించి అమెరికన్లకు అవగాహన కల్పించవచ్చని, దేశంలో మరింత సమ్మిళిత వాతావరణాన్ని ప్రోత్సహించవచ్చని ఆశాభావం వ్యక్తం చేశారు. 

"చెడుపై మంచి, అజ్ఞానంపై జ్ఞానం సాధించిన విజయానికి దీపావళి ప్రతీక. ప్రస్తుతం హిందూ, దక్షిణాసియా వ్యతిరేక విద్వేషం పెరుగుతున్న తరుణంలో, దీపావళిని ఫెడరల్ హాలిడేగా గుర్తించడం ద్వారా హిందువులు, సిక్కులు, జైనులు, బౌద్ధులు మన సమాజంలో గౌరవనీయ సభ్యులని బలమైన సందేశం పంపినట్లు అవుతుంది" అని ఆమె వివరించారు.

ఈ బిల్లు చట్టరూపం దాల్చి అమల్లోకి వస్తే, అమెరికాలో దీపావళి 12వ ఫెడరల్ హాలిడేగా మారుతుంది. ఇందుకోసం యూఎస్ కోడ్‌లోని టైటిల్ 5ను సవరించి, చట్టబద్ధమైన ప్రభుత్వ సెలవుల జాబితాలో 'దీపావళి డే'ను చేర్చనున్నారు. హిందువులతో పాటు సిక్కులు, జైనులు, బౌద్ధులు, దక్షిణాసియా, ఆగ్నేయాసియా, ఇండో-కరేబియన్ మూలాలున్న వారు ఈ పండుగను జరుపుకుంటారని బిల్లు మద్దతుదారులు పేర్కొన్నారు.

ఇటీవల కాలంలో అమెరికాలో హిందూ దేవాలయాలపై దాడులు, ఇల్లినాయిస్‌లో హిందువుల సమావేశాన్ని లక్ష్యంగా చేసుకుని సామూహిక కాల్పులకు కుట్ర, వాషింగ్టన్‌లో దీపావళి వేడుకలకు అంతరాయం వంటి విద్వేష ఘటనలు పెరిగిన నేపథ్యంలో ఈ బిల్లుకు ప్రాధాన్యత ఏర్పడింది. 

ఏషియన్ అమెరికన్స్ అడ్వాన్సింగ్ జస్టిస్, కోయలిషన్ ఆఫ్ హిందూస్ ఆఫ్ నార్త్ అమెరికా, సిఖ్ కోయలిషన్ వంటి పలు సంస్థలు ఈ బిల్లుకు తమ మద్దతు ప్రకటించాయి. గతంలో గ్రేస్ మెంగ్ 'లూనార్ న్యూ ఇయర్'కు కూడా ఇలాంటి చట్టం తీసుకురావడానికి కృషి చేసిన విషయం గమనార్హం.