ఫేక్ కాస్టింగ్ కాల్స్‌పై కమల్ హాసన్ నిర్మాణ సంస్థ రాజ్ కమల్ ఫిల్మ్స్ కీలక హెచ్చరిక

లోకనాయకుడు కమల్ హాసన్ నిర్మాణ సంస్థ ‘రాజ్ కమల్ ఫిల్మ్స్ ఇంటర్నేషనల్’ (ఆర్కేఎఫ్ఐ) నకిలీ కాస్టింగ్ కాల్స్‌పై తీవ్ర ఆగ్రహం వ్యక్తం చేసింది. కమల్ హాసన్ ప్రధాన పాత్రలో తెరకెక్కుతున్న తాజా చిత్రం ‘సండియార్’ సెట్స్‌పైకి వెళ్లిన మరుసటి రోజే నిర్మాణ సంస్థ ఈ కీలక ప్రకటన విడుదల చేసింది. తమ సినిమాల కోసం ఎలాంటి కాస్టింగ్ ఏజెంట్లను నియమించలేదని స్పష్టం చేస్తూ, సంస్థ పేరును అక్రమంగా వాడితే చట్టపరమైన చర్యలు తీసుకుంటామని హెచ్చరించింది.

ఈ మేరకు నిర్మాణ సంస్థ తన అధికారిక ఎక్స్ ఖాతాలో ఒక ప్రకటనను విడుదల చేసింది. "రాజ్ కమల్ ఫిల్మ్స్ ఇంటర్నేషనల్ తమ చిత్రాల కోసం ఎలాంటి కాస్టింగ్ ఏజెంట్లను నియమించలేదని స్పష్టం చేస్తున్నాం. నటనలో అవకాశాల పేరుతో మీకు వచ్చే ఈమెయిళ్లు, మేసేజ్‌లు, సోషల్ మీడియా పోస్టులను ఎట్టి పరిస్థితుల్లోనూ నమ్మవద్దు. ఎవరైనా అనుమతి లేకుండా రాజ్ కమల్ ఫిల్మ్స్ పేరును ఉపయోగిస్తే వారిపై కఠిన చట్టపరమైన చర్యలు తీసుకుంటాం" అని స్పష్టం చేసింది. గత ఏడాది కూడా నకిలీ కాస్టింగ్ కాల్స్‌పై నిర్మాణ సంస్థ రెండుసార్లు ప్రజలను హెచ్చరించింది. ముఖ్యంగా గత ఏడాది నవంబర్‌లో కూడా ఇలాంటి ఒక ప్రకటననే సంస్థ జారీ చేసింది.

సినీ పరిశ్రమలో నకిలీ కాస్టింగ్ కాల్స్ సమస్య కేవలం రాజ్ కమల్ ఫిల్మ్స్‌కే పరిమితం కాలేదు. గతంలో పలు ఇతర అగ్ర నిర్మాణ సంస్థలు సైతం ఇలాంటి మోసపూరిత పోస్టులపై స్పందించాల్సి వచ్చింది. 

సినిమాల్లో నటించాలనే ఆశతో ఉండే యువత, ఔత్సాహిక నటులను లక్ష్యంగా చేసుకుని కొందరు సైబర్ నేరగాళ్లు ఇలాంటి నకిలీ ఆడిషన్ పోస్టులతో మోసాలకు పాల్పడుతున్నట్టు తేలింది. ఈ నేపథ్యంలో సినీ ప్రియులు, కళాకారులు అప్రమత్తంగా ఉండాలని, కేవలం నిర్మాణ సంస్థల అధికారిక వేదికల నుంచి వచ్చే ప్రకటనలను మాత్రమే పరిగణనలోకి తీసుకోవాలని పరిశ్రమ వర్గాలు విజ్ఞప్తి చేస్తున్నాయి.