డైట్‌ పేరుతో ఒత్తిడి వద్దు.. ఆరోగ్యకరమైన ఆహారపు అలవాట్లకు నిపుణులు చెప్పే సూత్రాలివే!

ఆరోగ్యంగా ఉండాలంటే మంచి ఆహారం తీసుకోవాలి.. రోజూ వ్యాయామం చేయాలి.. చెడు అలవాట్లకు దూరంగా ఉండాలి. ఈ విషయాలు అందరికీ తెలిసినవే. అందుకే చాలామంది కొత్త ఏడాది మొదలైనప్పుడో, ఆరోగ్య సమస్యలు ఎదురైనప్పుడో డైట్‌ చార్ట్‌ సిద్ధం చేసుకుంటారు. కొన్నిరోజులు కచ్చితంగా పాటిస్తారు. ఆ తర్వాత ఉద్యోగ ఒత్తిడి, కుటుంబ బాధ్యతలు, ప్రయాణాలు, సమయాభావం వంటి కారణాలతో మళ్లీ పాత అలవాట్లలోకి వెళ్లిపోతారు. 

మరి ఆరోగ్యకరమైన ఆహారపు అలవాట్లు కొన్నిరోజులకే పరిమితం కాకుండా జీవితాంతం కొనసాగాలంటే ఏం చేయాలి? నిపుణుల సూచనల ప్రకారం.. దీనికి సమాధానం కఠినమైన డైట్‌ నియమాల్లో లేదు. మన రోజువారీ జీవితానికి సరిపోయే ఆహారపు అలవాట్లను అలవరచుకోవడంలోనే ఉంది.

పర్ఫెక్ట్‌ డైట్‌.. ఆచరణలో కష్టమే!
కాగితంపై రూపొందించిన డైట్‌ చార్ట్‌ చూడటానికి ఎంతో బాగుంటుంది. కానీ నిజ జీవితంలో పరిస్థితులు ఎప్పుడూ ఒకేలా ఉండవు. రాత్రి షిఫ్టుల్లో పనిచేసేవారికి నిర్ణీత సమయాల్లో భోజనం చేయడం కష్టమవుతుంది. కుటుంబ బాధ్యతలు ఉన్నవారు తమ కోసం ప్రత్యేకంగా వంట చేసుకోవడానికి సమయం కేటాయించలేకపోవచ్చు. ప్రయాణాల్లోనూ డైట్‌ చార్ట్‌ను యథాతథంగా పాటించడం సాధ్యం కాదు. 

ఇలాంటి సందర్భాల్లో డైట్‌ తప్పిందని బాధపడటం కంటే.. అందుబాటులో ఉన్న ఆహారంలో ఆరోగ్యకరమైన ఎంపికలు చేసుకోవడం మంచిది. మన జీవనశైలికి అనుగుణంగా ఉండే ఆహార నియమాలే ఎక్కువ కాలం కొనసాగుతాయి.

మన సంప్రదాయ ఆహారమే మేలు!
ఆరోగ్యంగా ఉండాలంటే ఖరీదైన ఆహార పదార్థాలు కొనాలని, విదేశీ ఆహార పద్ధతులను అనుసరించాలని చాలామంది భావిస్తుంటారు. కానీ మన ఇంట్లో నిత్యం తినే అన్నం, రొట్టె, పప్పు, కూరగాయలతోనే సమతుల్య ఆహారం తీసుకోవచ్చని నిపుణులు సూచిస్తున్నారు. వీటిని పూర్తిగా పక్కన పెట్టాల్సిన అవసరం లేదు. భోజనంలో పోషక విలువలు పెరిగేలా మార్పులు చేసుకుంటే సరిపోతుంది. 

భారత వైద్య పరిశోధనా మండలి (ఐసీఎంఆర్‌) పరిధిలోని నేషనల్‌ ఇన్‌స్టిట్యూట్‌ ఆఫ్‌ న్యూట్రిషన్‌ 2024లో విడుదల చేసిన ఆహార మార్గదర్శకాలు కూడా వైవిధ్యభరితమైన ఆహారానికి ప్రాధాన్యం ఇచ్చాయి. తృణధాన్యాలతో పాటు పప్పులు, చిక్కుళ్లు తీసుకోవాలని సూచించాయి. అంటే మన సంప్రదాయ భోజనంలోనే సరైన వైవిధ్యం పాటిస్తే మంచి పోషకాలు పొందవచ్చు.

అందరికీ ఒకే డైట్‌ పనిచేయదు!
ఒకరికి ప్రయోజనం కలిగించిన ఆహార నియమాలు మరొకరికి సరిపోకపోవచ్చు. వయసు, శారీరక శ్రమ, ఆరోగ్య పరిస్థితులు, గత వైద్య చరిత్ర ఆధారంగా పోషకాహార అవసరాలు మారుతుంటాయి. మధుమేహం ఉన్నవారు తీసుకోవాల్సిన జాగ్రత్తలు, బరువు తగ్గాలనుకునేవారి ఆహార పద్ధతులు వేర్వేరుగా ఉంటాయి. పీసీఓఎస్‌, థైరాయిడ్‌ సమస్యలు ఉన్నవారికీ వ్యక్తిగత ఆరోగ్య పరిస్థితులకు అనుగుణంగా సూచనలు అవసరం. అందుకే అందరికీ ఒకే డైట్‌ చార్ట్‌ను అనుసరించడం కంటే.. అర్హత కలిగిన వైద్యులు, పోషకాహార నిపుణుల సలహాతో ఆహార ప్రణాళిక రూపొందించుకోవడం మంచిది.

టెక్నాలజీతో వ్యక్తిగత సూచనలు
ఇప్పుడు ఆరోగ్య రంగంలో సాంకేతికత వినియోగం పెరుగుతోంది. వ్యక్తుల అవసరాలకు అనుగుణంగా పోషకాహార సూచనలు అందించేందుకు డిజిటల్‌ ప్లాట్‌ఫామ్‌లు ఉపయోగపడుతున్నాయి. 2024లో ఒబెసిటీ రివ్యూస్‌ జర్నల్‌లో ప్రచురితమైన ఓ సమీక్షలో 14 దేశాలకు చెందిన 19,670 మందిపై నిర్వహించిన 46 అధ్యయనాలను విశ్లేషించారు. 
సాంకేతికత ఆధారంగా అందించే వ్యక్తిగత పోషకాహార సూచనల ప్రభావాన్ని పరిశీలించారు. అయితే యాప్‌లు, డిజిటల్‌ సేవలు అందుబాటులో ఉన్నంత మాత్రాన ఆరోగ్యం మెరుగుపడుతుందని భావించకూడదు. వాటి ద్వారా అందే సమాచారం శాస్త్రీయ ఆధారాలతో కూడి ఉండాలి. వ్యక్తి ఆరోగ్య పరిస్థితులకు సరిపోవాలి.

క్రమశిక్షణ కంటే కొనసాగింపు ముఖ్యం!
ఆరోగ్యకరమైన ఆహారపు అలవాట్లు అలవరచుకోవడానికి ఒక్కసారిగా పెద్ద మార్పులు చేసుకోవాల్సిన అవసరం లేదు. రోజువారీ భోజనంలో చిన్నచిన్న మార్పులతో ప్రారంభించవచ్చు. తగినంత నీరు తాగడం, పండ్లు, కూరగాయలు తీసుకోవడం, భోజన సమయాలను సాధ్యమైనంతవరకు క్రమబద్ధీకరించడం వంటి అలవాట్లు మేలు చేస్తాయి. ప్రయాణాలు, పని ఒత్తిడి వల్ల ఒక్కోసారి డైట్‌ ప్లాన్‌ తప్పినా ఆందోళన చెందాల్సిన పనిలేదు. మళ్లీ సాధారణ ఆరోగ్యకరమైన పద్ధతిలోకి రావడంపై దృష్టి పెట్టాలి. అవసరమైనప్పుడు నిపుణుల మార్గదర్శకత్వం తీసుకోవాలి.