వివో నుంచి కొత్త క్లిప్‌ ఇయర్‌బడ్స్‌.. 42 గంటల బ్యాటరీ బ్యాకప్‌!

సాధారణ ఇయర్‌బడ్స్‌ చెవిలో పెట్టుకుంటే చుట్టుపక్కల శబ్దాలు వినిపించవు. ఈ సమస్యకు పరిష్కారంగా ఓపెన్‌ ఇయర్‌ డిజైన్‌తో కొత్త ఇయర్‌బడ్స్‌ను వివో తీసుకొచ్చింది. వివో బడ్స్‌ క్లిప్‌ పేరుతో రూపొందించిన ఈ ఇయర్‌బడ్స్‌ను తొలుత చైనా మార్కెట్లో విడుదల చేసిన సంస్థ.. తాజాగా యూరప్‌లోనూ అందుబాటులోకి తెచ్చింది. చెవి బయట భాగానికి క్లిప్‌లా అమరేలా వీటిని రూపొందించారు. ఒక్కో ఇయర్‌బడ్‌ బరువు కేవలం 5.2 గ్రాములే. చెవి రంధ్రాన్ని మూసివేయకపోవడంతో సంగీతం వింటూనే చుట్టుపక్కల శబ్దాలను కూడా వినవచ్చు.

12 ఎంఎం డ్రైవర్లు.. మెరుగైన ఆడియో
వివో బడ్స్‌ క్లిప్‌లో 12 ఎంఎం డ్యూయల్‌ మాగ్నెటిక్‌ మూవింగ్‌ కాయిల్‌ డ్రైవర్లను అమర్చారు. ఇవి ఎల్‌డీఏసీ, ఏఏసీ, ఎస్‌బీసీ, ఎల్‌సీ3 ఆడియో కోడెక్‌లకు మద్దతు ఇస్తాయి. హై-రెస్‌ ఆడియో వైర్‌లెస్‌ సర్టిఫికేషన్‌ కూడా ఉంది. డీప్‌ఎక్స్‌ 5.0 స్టీరియో సౌండ్‌, స్పేషియల్‌ ఆడియో, కస్టమ్‌ ఈక్వలైజర్‌ వంటి ఫీచర్లు ఉన్నాయి. వినియోగదారులు తమ అభిరుచికి తగ్గట్టుగా సౌండ్‌ సెట్టింగులను మార్చుకోవచ్చు. చుట్టుపక్కల వారికి శబ్దం ఎక్కువగా వినిపించకుండా డైరెక్షనల్‌ ఆడియో లీకేజీ నియంత్రణ ఫీచర్‌ను కూడా అందించారు.

ఏఐతో కాల్స్‌.. మూడు పరికరాలకు కనెక్షన్‌
ఫోన్‌ కాల్స్‌ సమయంలో స్పష్టమైన వాయిస్‌ కోసం డ్యూయల్‌ మైక్రోఫోన్లు, బోన్‌ కండక్షన్‌ వాయిస్‌ పికప్‌ యూనిట్‌ (VPU) ఉన్నాయి. ఏఐ ఆధారిత నాయిస్‌ రిడక్షన్‌ ఫీచర్‌ గాలి, రోడ్డు శబ్దాల వంటి వాటిని తగ్గించేందుకు ఉపయోగపడుతుంది. బ్లూటూత్‌ 5.4 కనెక్టివిటీతో ఒకేసారి మూడు పరికరాలకు కనెక్ట్‌ చేసుకోవచ్చు. రియల్‌ టైమ్‌ అనువాదం, ఏఐ ఆధారిత అలర్ట్‌లు వంటి సదుపాయాలు కూడా ఉన్నాయి. అయితే కొన్ని స్మార్ట్‌ ఫీచర్లు పనిచేయాలంటే అనుకూలమైన వివో లేదా ఐకూ ఫోన్‌ అవసరం.

ఛార్జింగ్‌తో కలిపి 42 గంటల బ్యాకప్‌
బ్యాటరీ విషయంలోనూ ఈ ఇయర్‌బడ్స్‌ ఆకట్టుకుంటున్నాయి. ఒక్కసారి ఛార్జ్‌ చేస్తే 10 గంటల వరకు ఆడియో వినవచ్చని వివో తెలిపింది. ఛార్జింగ్‌ కేసుతో కలిపి మొత్తం 42 గంటల బ్యాకప్‌ లభిస్తుంది. కేవలం 10 నిమిషాలు ఛార్జ్‌ చేస్తే మూడు గంటల వరకు వినియోగించుకోవచ్చని కంపెనీ పేర్కొంది. చెమట, నీటి తుంపర్లు, దుమ్ము నుంచి రక్షణ కోసం ఇయర్‌బడ్స్‌కు ఐపీ55 రేటింగ్‌ ఇచ్చారు. ఈ రేటింగ్‌ ఛార్జింగ్‌ కేసుకు వర్తించదు. టైటానియం మెమరీ అల్లాయ్‌తో రూపొందించిన ఫ్లెక్సిబుల్‌ బ్రిడ్జి చెవికి సౌకర్యంగా అమరేలా చేస్తుంది.

ధర ఎంతంటే.. భారత్‌లో ఎప్పుడొస్తాయి?
యూరప్‌ మార్కెట్లో వివో బడ్స్‌ క్లిప్‌ ధర 179 యూరోలు. భారత కరెన్సీలో ఇది సుమారు రూ.19 వేలుగా ఉంటుంది. అరోరా పర్పుల్‌, స్టార్ డస్ట్‌ బ్లాక్‌ రంగుల్లో అందుబాటులో ఉన్నాయి.