హైదరాబాద్‌లో లేడీ కిలాడి: ఆన్‌లైన్‌లో చూసి చోరీలు.. అరెస్ట్ చేసిన పోలీసులు

హైదరాబాద్‌ నగరంలో వరుస దొంగతనాలకు పాల్పడుతూ పోలీసులకు సవాల్ విసిరిన 25 ఏళ్ల యువతిని ఉప్పల్ జోన్ పోలీసులు అరెస్ట్ చేశారు. ఆన్‌లైన్ వీడియోలు చూసి దొంగతనం చేసే పద్ధతులు నేర్చుకుని, తనను ఎవరూ గుర్తుపట్టకుండా బురఖా ధరించి నేరాలకు పాల్పడినట్లు పోలీసులు గుర్తించారు. నిందితురాలి నుంచి సుమారు రూ. 70 లక్షల విలువైన బంగారం, వెండి ఆభరణాలు, నగదు స్వాధీనం చేసుకున్నారు.

పోలీసుల కథనం ప్రకారం.. భద్రాద్రి కొత్తగూడెం జిల్లా పాల్వంచకు చెందిన పాగ జయ (25) ఆర్థిక ఇబ్బందుల కారణంగా బీటెక్ మొదటి సంవత్సరంలోనే చదువు ఆపేసింది. 2023లో హైదరాబాద్‌కు వచ్చి, 2024లో వివాహం చేసుకుని న్యూ భరత్ నగర్ కాలనీలో నివసిస్తోంది. సులభంగా డబ్బు సంపాదించాలనే ఆలోచనతో దొంగతనాలను ఎంచుకుంది. ఇందుకోసం ఆన్‌లైన్ వీడియోల ద్వారా తాళాలు పగలగొట్టే పద్ధతులను నేర్చుకుంది.

పగటిపూట తాళం వేసి ఉన్న ఇళ్లను లక్ష్యంగా చేసుకుని, తన గుర్తింపు బయటపడకుండా నల్లటి బురఖా, చేతికి గ్లౌజులు ధరించేది. బ్యాక్‌ప్యాక్‌లో హ్యాండ్ కటింగ్ మెషిన్ తీసుకెళ్లి, దానితో ఇంటి తాళాలు, బీరువాలు పగలగొట్టి బంగారం, వెండి, నగదు దోచుకెళ్లేది.

అక్టోబర్ 26న ఉప్పల్‌లోని న్యూ భరత్ నగర్ కాలనీలో ఓ కుటుంబం గుడికి వెళ్లిన సమయంలో జయ వారి ఇంట్లో చోరీకి పాల్పడింది. మరుసటి రోజు ఇంటి యజమానులు ఇచ్చిన ఫిర్యాదుతో పోలీసులు కేసు నమోదు చేశారు. సీసీటీవీ ఫుటేజీని పరిశీలించగా, నల్లటి బురఖా, నీలం రంగు బ్యాక్‌ప్యాక్‌తో ఉన్న మహిళ కదలికలు అనుమానాస్పదంగా కనిపించాయి. దీని ఆధారంగా దర్యాప్తు చేపట్టిన ఉప్పల్ పోలీసులు, మల్కాజ్‌గిరి సీసీఎస్ బృందం.. అక్టోబర్ 31న ఉప్పల్ ఎక్స్ రోడ్స్ వద్ద జయను అదుపులోకి తీసుకున్నారు. విచారణలో ఆమె ఐదు దొంగతనాలు చేసినట్లు అంగీకరించింది.

నిందితురాలి నుంచి 560 గ్రాముల బంగారం, 1.5 కిలోల వెండి వస్తువులు, కొంత నగదు, ఒక ఐఫోన్ 17ను పోలీసులు స్వాధీనం చేసుకున్నారు. ఉప్పల్, మేడిపల్లి, జగద్గిరిగుట్ట, భద్రాద్రి కొత్తగూడెం టూ టౌన్ పోలీస్ స్టేషన్ల పరిధిలో ఆమెపై కేసులు నమోదైనట్లు అధికారులు తెలిపారు. నిందితురాలిని జ్యుడీషియల్ కస్టడీకి తరలించి, కేసుపై మరింత లోతుగా దర్యాప్తు చేస్తున్నారు.