ఢిల్లీలో 'ఇండియా' కూటమి భారీ నిరసన.. తరలిరావాలని ప్రకాశ్ రాజ్ పిలుపు

కేంద్ర ఎన్నికల సంఘం ప్రధాన కమిషనర్ (సీఈసీ) జ్ఞానేశ్ కుమార్ తక్షణమే రాజీనామా చేయాలని డిమాండ్ చేస్తూ 'ఇండియా' కూటమి ఢిల్లీలో భారీ నిరసనకు పిలుపునిచ్చింది. రేపు (నవంబరు 1) రామ్‌లీలా మైదానంలో 'ఛలో ఢిల్లీ' పేరుతో జరగనున్న ఈ నిరసనకు ప్రజలు పెద్ద ఎత్తున తరలిరావాలని కాంగ్రెస్ పార్టీతో పాటు పలు ప్రజాసంఘాలు విజ్ఞప్తి చేశాయి.

ఈ ఆందోళనలో భాగంగా ఓటర్ల జాబితా ప్రత్యేక సవరణ (సర్) ప్రక్రియను పూర్తిగా నిలిపివేయాలని, ఎన్నికల కమిషనర్ల నియామకాలకు సంబంధించి కేంద్రం తీసుకొచ్చిన వివాదాస్పద 2023 చట్టాన్ని రద్దు చేయాలని విపక్షాలు డిమాండ్ చేస్తున్నాయి. ఈ మేరకు ఆల్ ఇండియా స్టూడెంట్స్ అసోసియేషన్ (AISA) జాతీయ అధ్యక్షురాలు నేహా బోరా మాట్లాడుతూ, "ఓటింగ్ హక్కులను, ప్రజాస్వామ్య పవిత్రతను కాపాడుకోవడానికి పౌరులంతా రామ్‌లీలా మైదానానికి తరలిరావాలి" అని కోరారు.

మరోవైపు, ప్రముఖ నటుడు ప్రకాశ్ రాజ్ కూడా ఈ నిరసనకు మద్దతు తెలుపుతూ ఒక వీడియో సందేశం విడుదల చేశారు. ప్రజాస్వామ్యాన్ని కాపాడేందుకు రాహుల్ గాంధీ, ఇండియా కూటమి ఆధ్వర్యంలో జరుగుతున్న ఈ కార్యక్రమంలో ప్రతిఒక్కరూ భాగస్వాములు కావాలని ఆయన పిలుపునిచ్చారు. ఈ నిరసన కార్యక్రమానికి దేశభక్తులను మాత్రమే ఆహ్వానిస్తున్నామని, దేశాన్ని కాపాడేందుకు తాను కూడా హాజరవుతున్నానని స్పష్టం చేశారు. ఈ కార్యక్రమంలో నేహా బోరా, అభిజిత్ దీప్కే వంటి వారు కూడా పాల్గొంటారని ఆయన తెలిపారు.