ప్రముఖ నటుడు ధనుష్ రాజకీయ ప్రవేశంపై ఊహాగానాలు మరింత బలపడుతున్నాయి. ఇప్పటికే ఆయన తన అభిమాన సంఘాల ద్వారా ప్రజల్లోకి వెళ్లే కార్యక్రమాలను చేపట్టారు. తాజాగా, తన సేవా కార్యక్రమాలను విస్తృతం చేస్తూ ఆయన తీసుకున్న ఓ కీలక నిర్ణయం ఇప్పుడు తమిళనాట చర్చనీయాంశంగా మారింది. తన 'ధనుష్ నార్పని ఇయక్కం' (ధనుష్ సంక్షేమ ఉద్యమం) సంస్థ ద్వారా రాష్ట్రంలోని పేద విద్యార్థుల కోసం ఉచితంగా ఏసీ ట్యూషన్ సెంటర్లు ఏర్పాటు చేయడానికి సిద్ధమవుతున్నారు.

2027 జనవరి నుంచి ఈ పథకాన్ని ప్రారంభించాలని లక్ష్యంగా పెట్టుకున్నారు. తొలి దశలో రాష్ట్రంలోని 234 నియోజకవర్గాల్లోనూ 10, 12వ తరగతి విద్యార్థుల కోసం 'స్మార్ట్ స్టడీ హబ్స్' పేరిట ఈ ఏసీ ట్యూషన్ సెంటర్లను ఏర్పాటు చేయనున్నారు. ప్రతి కేంద్రంలో ముగ్గురు ఉపాధ్యాయులు, ఒక సహాయకుడిని నియమించనున్నారు. వారి జీతభత్యాలను ధనుష్ సేవా సంస్థనే చెల్లించనుంది.

ఇప్పటికే ధనుష్ 'తమిళగ ఎళుచ్చి కళగం' అనే పేరుతో రాజకీయ పార్టీని నమోదు చేశారనే ప్రచారం జరుగుతోంది. ఈ నేపథ్యంలో ఆయన తన అభిమాన సంఘాలను సంక్షేమ సంస్థగా మార్చి సేవా కార్యక్రమాలను ముమ్మరం చేశారు. ఇటీవల సుమారు 3,000 మంది మహిళా సభ్యులతో చెన్నైలో సమావేశం నిర్వహించడం కూడా ఈ ఊహాగానాలకు బలం చేకూర్చింది. అయితే, తన రాజకీయ ప్రవేశంపై ధనుష్ ఇప్పటివరకు ఎలాంటి అధికారిక ప్రకటనా చేయలేదు. ఈ విద్యా కార్యక్రమం మాత్రం ఆయన రాజకీయ ఆరంగేట్రానికి బలమైన పునాది వేస్తుందని విశ్లేషకులు భావిస్తున్నారు.