ప్రముఖ పారిశ్రామికవేత్త, మహీంద్రా గ్రూప్ ఛైర్మన్ ఆనంద్ మహీంద్రా మరోసారి తన సోషల్ మీడియా పోస్ట్‌తో అందరి దృష్టిని ఆకర్షించారు. విశాఖపట్నం సమీపంలోని గంగవరం బీచ్ అద్భుతమైన సౌందర్యంపై ఆయన ప్రశంసల వర్షం కురిపించారు. ఈ బీచ్ ఫొటోలను పంచుకుంటూ, భారతదేశంలో పెద్దగా గుర్తింపుకు నోచుకోని తీరప్రాంత సౌందర్య ప్రదేశాల్లో ఇది ఎందుకు ఒకటిగా ఉందని ఆశ్చర్యం వ్యక్తం చేశారు.

ఆదివారం తన 'సండే వాండరర్' సిరీస్‌లో భాగంగా ఆనంద్ మహీంద్రా గంగవరం బీచ్ గురించి ప్రత్యేకంగా ప్రస్తావించారు. "ఇది సాధారణంగా మనం ఊహించుకునే కొబ్బరి చెట్ల వరుసలతో ఉన్న బీచ్ కాదు. దీనికి భిన్నంగా, ఇక్కడి ఎత్తైన రాతి శిఖరాలు, కఠినమైన, ఆదిమానవుల కాలం నాటి సహజ సౌందర్యం ఆకట్టుకుంటాయి. నిజం చెప్పాలంటే, ఇలాంటి సహజమైన అందమే నన్ను మరింతగా ఆకర్షిస్తుంది. ఇది కేవలం సేదతీరడానికే కాకుండా, లోతుగా ఆలోచింపజేసే ప్రదేశం" అని ఆయన తన పోస్ట్‌లో పేర్కొన్నారు.

వైజాగ్ అభివృద్ధిని ప్రకృతి సౌందర్యంతో పోలుస్తూ ఆయన ఒక ఆసక్తికరమైన వైరుధ్యాన్ని ప్రస్తావించారు. "ప్రపంచ టెక్ దిగ్గజాలు హైపర్‌స్కేల్ డేటా సెంటర్లు, ఏఐ ఇన్‌ఫ్రాస్ట్రక్చర్ నిర్మించడానికి వైజాగ్‌కు తరలివస్తున్నాయి. కానీ, ఈ ఫొటోలు చూస్తుంటే, లక్షలాది సంవత్సరాల క్రితమే ప్రకృతి ఇక్కడ తన హైపర్‌స్కేలింగ్ వ్యాపారాన్ని ప్రారంభించిందని అనిపిస్తోంది" అని చమత్కరించారు.

వైజాగ్ భవిష్యత్తుపై తన అంచనాను వివరిస్తూ, "వైజాగ్ ఒక ప్రధాన టెక్నాలజీ హబ్‌గా మారే మార్గంలో స్పష్టంగా ఉంది. అయితే, అదే సమయంలో భారతదేశంలో అత్యంత ఆకర్షణీయమైన తీరప్రాంత పర్యాటక కేంద్రాలలో ఒకటిగా మారే గొప్ప సామర్థ్యం కూడా దీనికి ఉందని నేను బలంగా నమ్ముతున్నాను. ఇక్కడ ఒకేసారి రెండు రకాల అద్భుతమైన వృద్ధి గాథలు ఆవిష్కృతమవుతున్నాయి" అని ఆనంద్ మహీంద్రా విశ్లేషించారు. 'ఇండియా ఎస్తెటికా' అందించిన ఈ ఫొటోల్లో రంగులు కొంచెం పెంచి ఉండొచ్చని, కానీ అక్కడి ప్రకృతి దృశ్యం మాత్రం ఎట్టి పరిస్థితుల్లోనూ నిరాశపరచదని ఆయన తన పోస్ట్‌ను ముగించారు. ఈ పోస్ట్ ప్రస్తుతం సోషల్ మీడియాలో వైరల్‌గా మారింది.