జనసేన అభ్యర్థుల తొలి జాబితా వచ్చేసింది.. విజయవాడ మేయర్ అభ్యర్థిగా వంగవీటి రాధా

ఏపీలో జరగనున్న స్థానిక సంస్థల ఎన్నికల కోసం జనసేన పార్టీ తన అభ్యర్థుల తొలి జాబితాను విడుదల చేసింది. అధికార కూటమిలో పొత్తుల సర్దుబాటులో భాగంగా తమకు కేటాయించిన స్థానాల్లో పోటీ చేసే మేయర్, మున్సిపల్ ఛైర్మన్ అభ్యర్థుల పేర్లను శనివారం అధికారికంగా ప్రకటించింది. మంగళగిరిలోని పార్టీ కేంద్ర కార్యాలయం నుంచి ఈ జాబితాను విడుదల చేశారు.

రాజకీయ వర్గాలు ఆసక్తిగా ఎదురుచూస్తున్న విజయవాడ మున్సిపల్ కార్పొరేషన్ మేయర్ అభ్యర్థిగా వంగవీటి రాధాకృష్ణ పేరును జనసేన ఖరారు చేసింది. అదేవిధంగా ఏలూరు నగరపాలక సంస్థ మేయర్ అభ్యర్థిగా రెడ్డి అప్పలనాయుడును బరిలోకి దించుతున్నట్లు వెల్లడించింది.

వీరితో పాటు 12 మున్సిపాలిటీలకు ఛైర్మన్ అభ్యర్థుల పేర్లను కూడా పార్టీ ప్రకటించింది. 

• అమలాపురం: నల్ల శ్రీధర్ 
• చిలకలూరిపేట: తోట రాజేశ్వరి 
• గొల్లప్రోలు: కడారి తమ్మయ్య నాయుడు 
• నరసాపురం: కొత్తపల్లి శైలజ 
• నిడదవోలు: కల్లం జ్యోతి 
• పెడన: మట్టా శివపావని 
• పిఠాపురం: బీరా విజయ్ శేఖర్ 
• పుత్తూరు: డి. ఏలుమలై 
• సాలూరు: గొర్లె విజయకుమారి 
• సామర్లకోట: పిట్టా జానకీ రామారావు 
• తెనాలి: టి. వెంకటరమణారావు 
• తిరువూరు: పి. మాధవి

టీడీపీ, బీజేపీతో ఉన్న కూటమిలో సీట్ల పంపకాల ఒప్పందం ప్రకారం, జనసేన పార్టీ మొత్తం నాలుగు మున్సిపల్ కార్పొరేషన్లు (శ్రీకాకుళం, కాకినాడ, ఏలూరు, విజయవాడ) మరియు 21 మున్సిపాలిటీలు/నగర పంచాయతీలలో పోటీ చేయనుంది. ప్రస్తుతం ప్రకటించినవి తొలి విడత అభ్యర్థులు మాత్రమేనని, త్వరలోనే మిగిలిన స్థానాలకు కూడా పేర్లను వెల్లడిస్తామని పార్టీ వర్గాలు తెలిపాయి.