నైట్ డ్యూటీలో భర్త.. ఇంటి భోజనం తెచ్చిన భార్య.. మనసుల్ని గెలుస్తున్న వీడియో

ప్రేమను వ్యక్తపరచడానికి పెద్ద పెద్ద బహుమతులు, ఖరీదైన కానుకలు అవసరం లేదు. మనసుకు నచ్చిన వారికి తోడుగా ఉన్నామనే భరోసా ఇస్తే చాలు. ఇలాంటి ఓ అందమైన దృశ్యమే ఇప్పుడు సోషల్ మీడియాలో వైరల్ అవుతూ ఎందరి మనసుల్నో గెలుచుకుంటోంది. హెచ్‌డీఎఫ్‌సీ బ్యాంకు వద్ద నైట్ డ్యూటీ చేస్తున్న ఓ సెక్యూరిటీ గార్డు కోసం, ఆయన భార్య ఇంటి నుంచి భోజనం తీసుకువచ్చింది. బ్యాంకు బయటే ఇద్దరూ కలిసి కూర్చుని ప్రశాంతంగా భోజనం చేశారు.

జ్ఞానద్ భట్ అనే ఎక్స్ యూజర్ ఈ వీడియోను పంచుకున్నారు. ఈ వీడియోలో, మూసి ఉన్న బ్యాంకు షట్టర్ల ముందు ఉన్న చిన్న టేబుల్ వద్ద సెక్యూరిటీ గార్డు, ఆయన భార్య కూర్చుని భోజనం చేస్తూ మాట్లాడుకోవడం కనిపిస్తుంది. రాత్రిపూట ప్రశాంత వాతావరణంలో వారిద్దరూ గడిపిన ఈ క్షణాలను వీడియో తీశారు. "మీ సంతోషంలో ఉండొచ్చు, ఉండకపోవచ్చు.. కానీ మీ కష్టాల్లో ఎప్పుడూ తోడుంటారు" అనే వాక్యాన్ని ఈ వీడియోపై జతచేశారు.

ఈ వీడియోను పోస్ట్ చేసిన జ్ఞానద్ భట్, "హోదా, డబ్బు, కెరీర్ వంటి వాటితో బంధాలను కొలిచే ఈ రోజుల్లో ఇలాంటి నిస్వార్థమైన ప్రేమ అరుదు. సమాజం దృష్టిలో ఆ వ్యక్తి వద్ద ఏమీ లేకపోవచ్చు, కానీ జీవితానికి నిజంగా అవసరమైన తోడు అతడికి ఉంది. కొన్ని బంధాలు స్వర్గంలోనే రాసిపెడతారేమో" అంటూ తన క్యాప్షన్‌లో పేర్కొన్నారు.

ఈ వీడియో ఆన్‌లైన్‌లో ఎంతో మందిని ఆకట్టుకుంది. ఇది చూసిన నెటిజన్లు భావోద్వేగానికి గురవుతున్నారు. ఇదే నిజమైన ప్రేమ, బంధం అంటే ఇదేనంటూ కామెంట్లు పెడుతున్నారు. వండిపెట్టడం, సంపాదించడం, రక్షణగా ఉండటం వంటివి బరువుగా కాకుండా ప్రేమను వ్యక్తపరిచే మార్గాలని పలువురు అభిప్రాయపడుతున్నారు. డబ్బు, హోదాలతో సంబంధం లేకుండా.. ఒకరికొకరు తోడుగా ఉండటమే నిజమైన ఆస్తి అని ఈ జంట నిరూపిస్తోందని ప్రశంసల వర్షం కురిపిస్తున్నారు.