ఇరానీ కప్ రెస్టాఫ్ ఇండియా కైవసం.. ముఖేష్ కుమార్ దెబ్బకు జమ్మూ కశ్మీర్ చిత్తు

ఫాస్ట్ బౌలర్ ముఖేష్ కుమార్ నిప్పులు చెరిగే బౌలింగ్‌తో రెచ్చిపోవడంతో రెస్టాఫ్ ఇండియా జట్టు 31వ సారి ఇరానీ కప్ టైటిల్‌ను కైవసం చేసుకుంది. షేర్-ఇ-కశ్మీర్ స్టేడియంలో జరిగిన ఈ మ్యాచ్‌లో రంజీ ట్రోఫీ ఛాంపియన్ జమ్మూ కశ్మీర్‌ను 167 పరుగుల భారీ తేడాతో చిత్తు చేసింది. ఆదివారం, నాలుగో రోజు 279 పరుగుల లక్ష్య ఛేదనలో జమ్మూ కశ్మీర్ జట్టు పేకమేడలా కుప్పకూలింది.

లంచ్ విరామానికి 89/3 స్కోరుతో పటిష్ఠంగానే కనిపించిన జమ్మూ కశ్మీర్, విరామం తర్వాత గంట వ్యవధిలోనే చేతులెత్తేసింది. ముఖ్యంగా ముఖేష్ కుమార్ తన అద్భుతమైన స్పెల్‌తో ప్రత్యర్థి పతనాన్ని శాసించాడు. కేవలం 33 పరుగులిచ్చి 6 వికెట్లు పడగొట్టి ఫస్ట్ క్లాస్ క్రికెట్‌లో 11వ సారి ఐదు వికెట్ల ప్రదర్శన నమోదు చేశాడు. ఒకే ఓవర్‌లో నాలుగు బంతుల వ్యవధిలో మూడు వికెట్లు తీసి జమ్మూ కశ్మీర్ మిడిలార్డర్ వెన్ను విరిచాడు. అతనికి ఆకాశ్ దీప్ (3/25) చక్కటి సహకారం అందించాడు. మరో పేసర్ ముఖేష్ చౌదరి కీలకమైన అబ్దుల్ సమద్ వికెట్‌ను తీశాడు. దీంతో కశ్మీర్ జట్టు 28.4 ఓవర్లలో కేవలం 111 పరుగులకే ఆలౌటైంది. ఆ జట్టులో శుభమ్ ఖజురియా (36), కమ్రాన్ ఇక్బాల్ (32), అబ్దుల్ సమద్ (20) మాత్రమే రెండంకెల స్కోరు చేయగలిగారు.

అంతకుముందు, రెస్టాఫ్ ఇండియా తొలి ఇన్నింగ్స్‌లో 237 పరుగులు చేయగా, జమ్మూ కశ్మీర్ 278 పరుగులు చేసి తొలి ఇన్నింగ్స్ ఆధిక్యం సాధించింది. అయితే, రెండో ఇన్నింగ్స్‌లో స్మరణ్ రవిచంద్రన్ (135) అద్భుత సెంచరీతో రెస్టాఫ్ ఇండియా 319 పరుగులు చేసి తిరిగి పోటీలోకి వచ్చింది. స్మరణ్ తొలి ఇన్నింగ్స్‌లోనూ 68 పరుగులతో రాణించడంతో అతనికి "ప్లేయర్ ఆఫ్ ద మ్యాచ్" అవార్డు లభించింది.

జ్వరంతో బాధపడుతున్న రెగ్యులర్ కెప్టెన్ రిషభ్ పంత్ డగౌట్‌కే పరిమితం కాగా, అతని స్థానంలో సర్ఫరాజ్ ఖాన్ కెప్టెన్‌గా జట్టును విజయపథంలో నడిపించాడు. పంత్ పుట్టినరోజున ఈ విజయం అతనికి మంచి బహుమతిగా నిలిచింది. కాగా, రెండు ఇన్నింగ్స్‌లలో కలిపి 20కి పైగా నో-బాల్స్ వేయడం జమ్మూ కశ్మీర్ ఓటమికి ప్రధాన కారణాల్లో ఒకటిగా నిలిచింది.