విఖ్యాత ఆవిష్కర్త, పారిశ్రామికవేత్త జి.డి. నాయుడు జీవితం ఆధారంగా తెరకెక్కిన చిత్రాన్ని వీక్షించిన ఏపీ మంత్రి నారా లోకేశ్, ఆయనపై ప్రశంసల వర్షం కురిపించారు. జి.డి. నాయుడుని "భారతదేశపు ఎడిసన్"గా అభివర్ణించిన లోకేశ్, ఆయన తన కాలం కన్నా దశాబ్దాల ముందుచూపుతో ఆలోచించిన గొప్ప దార్శనికుడని కొనియాడారు. ఈ మేరకు ఆయన తన అభిప్రాయాలను పంచుకున్నారు.

"అద్భుతమైన వ్యక్తి జి.డి. నాయుడు జీవితంపై తీసిన సినిమా చూశాను. ఆయన అసలైన 'భారతదేశపు ఎడిసన్'. తన కాలం కన్నా ఎంతో ముందున్న దార్శనికత కలిగిన ఆవిష్కర్త, పారిశ్రామికవేత్త" అని లోకేశ్ పేర్కొన్నారు. ఇలాంటి గొప్ప వ్యక్తుల కథలు దక్షిణాది వారసత్వ సంపదలో భాగమని ఆయన అభిప్రాయపడ్డారు.

ఆంధ్రప్రదేశ్, తమిళనాడు రాష్ట్రాల మధ్య చారిత్రక, సాంస్కృతిక, ఆర్థిక బంధాలు చాలా బలమైనవని లోకేశ్ గుర్తుచేశారు. జి.డి. నాయుడు వంటి వారి స్ఫూర్తిదాయక జీవిత గాథలు దక్షిణాదిలో పాతుకుపోయిన పారిశ్రామిక, ఆవిష్కరణల వారసత్వానికి నిదర్శనమని అన్నారు. ఈ తరహా అసాధారణమైన జీవిత కథలను మన సినిమా వెండితెరపైకి తీసుకురావడం పట్ల ఆయన సంతోషం వ్యక్తం చేశారు.

"మనకంటే ముందు కలలు కని, కొత్త ఆవిష్కరణలు చేసి, దేశ నిర్మాణంలో పాలుపంచుకున్న మార్గదర్శకుల గురించి నేటి యువతరం తప్పకుండా తెలుసుకోవాలి. ఇలాంటి చిత్రాలు వారికి స్ఫూర్తినిస్తాయి" అని లోకేశ్ తెలిపారు. గొప్ప వ్యక్తుల జీవితాలను నేటి తరానికి తెలియజేస్తున్న చిత్ర పరిశ్రమను ఆయన అభినందించారు.

కాగా, జి.డి.నాయుడు జీవిత కథ ఆధారంగా తెరకెక్కిన చిత్రంలో మాధవన్ లీడ్ రోల్ పోషించాడు. జీడీఎన్ (జి.డి.నాయుడు) పేరిట ప్రేక్షకుల ముందుకు వచ్చిన ఈ చిత్రానికి మాధవన్ దర్శకత్వం కూడా వహించాడు.