ఇంటింటికీ టీడీపీ.. 92 లక్షల ఇళ్లకు చేరిన కార్యక్రమం

కూటమి ప్రభుత్వ రెండేళ్ల పాలనలో చేపట్టిన అభివృద్ధి, సంక్షేమ కార్యక్రమాలను ప్రజల్లోకి తీసుకెళ్లే లక్ష్యంతో తెలుగుదేశం పార్టీ నిర్వహిస్తున్న 'ఇంటింటికీ తెలుగుదేశం – 2 ఏళ్ల నమ్మకం' కార్యక్రమం రాష్ట్రవ్యాప్తంగా ఉత్సాహంగా కొనసాగుతోంది. 34వ రోజుకు చేరిన ఈ కార్యక్రమం ద్వారా ఇప్పటివరకు రాష్ట్రవ్యాప్తంగా 92.43 లక్షల కుటుంబాలను టీడీపీ నాయకులు, కార్యకర్తలు నేరుగా కలిశారు.

శనివారం ఒక్కరోజే 1,87,654 ఇళ్లను సందర్శించినట్లు పార్టీ వర్గాలు వెల్లడించాయి. ప్రభుత్వ పనితీరుపై ప్రజల స్పందనను తెలుసుకోవడంతో పాటు, వారి సమస్యలను అడిగి తెలుసుకునేందుకు ఈ కార్యక్రమాన్ని విస్తృతంగా నిర్వహిస్తున్నారు. టీడీపీ శ్రేణులు ప్రతి గడపకు వెళ్లి, ప్రభుత్వ పథకాల ద్వారా రైతులకు, మహిళలకు, యువతకు, పేదలకు అందుతున్న ప్రయోజనాలను వివరిస్తున్నారు.

ఈ కార్యక్రమంలో భాగంగా, ప్రజల నుంచి వస్తున్న అభిప్రాయాలను, సూచనలను స్వీకరించి, వాటి పరిష్కారానికి కృషి చేస్తున్నారు. క్షేత్రస్థాయిలో ప్రజల నుంచి విశేష స్పందన లభిస్తోందని, పార్టీ కార్యకర్తలతో పాటు సాధారణ ప్రజలు కూడా స్వచ్ఛందంగా పాల్గొంటున్నారని టీడీపీ నాయకులు తెలిపారు. ప్రజా భాగస్వామ్యంతో ఈ కార్యక్రమం మరింత విజయవంతంగా ముందుకు సాగుతోంది.