తెలుగు ఓటీటీలో జీ5 దూకుడు.. భారీ చిత్రాలు, ఒరిజినల్స్‌తో కంటెంట్ జాతర

ప్రముఖ ఓటీటీ వేదిక జీ5, తెలుగు వినోద రంగంలో తన స్థానాన్ని మరింత పదిలం చేసుకునేందుకు భారీ ప్రణాళికతో ముందుకొచ్చింది. సరికొత్త ఒరిజినల్స్, బ్లాక్‌బస్టర్ చిత్రాలు, స్టార్ హీరోల ప్రాజెక్టులతో కూడిన మెగా కంటెంట్ లైనప్‌ను ప్రకటించి ప్రేక్షకుల్లో భారీ అంచనాలను రేకెత్తించింది. తెలుగు ప్రేక్షకుల అభిరుచికి, సాంస్కృతిక మూలాలకు పెద్దపీట వేస్తూ, విభిన్నమైన కథలతో వినోదాన్ని సరికొత్త స్థాయికి తీసుకెళ్లడమే లక్ష్యంగా ఈ లైనప్‌ను రూపొందించినట్లు జీ5 స్పష్టం చేసింది.

ఈ కంటెంట్ జాతరకు మరింత బలాన్ని చేకూరుస్తూ, తెలుగు సినీ పరిశ్రమలోని పలు దిగ్గజ నిర్మాణ సంస్థలతో జీ5 వ్యూహాత్మక భాగస్వామ్యాలను కుదుర్చుకుంది. వైజయంతీ మూవీస్, సుకుమార్ రైటింగ్స్, శ్రీ వెంకటేశ్వర సినీ చిత్ర (ఎస్వీసీసీ), ప్రైమ్ షో ఎంటర్‌టైన్‌మెంట్, షైన్ స్క్రీన్స్, వృద్ధి సినిమాస్ వంటి ప్రముఖ బ్యానర్‌లతో కలిసి పనిచేయనుండటం ఈ లైనప్‌పై అంచనాలను రెట్టింపు చేస్తోంది.

సినిమా ప్రియులకు పండగే..
ప్రస్తుతం ప్రేక్షకులు ఎంతో ఆసక్తిగా ఎదురుచూస్తున్న పలు భారీ చిత్రాలు ఈ లైనప్‌లో ఉండటం విశేషం. నందమూరి బాలకృష్ణ కథానాయకుడిగా గోపీచంద్ మలినేని దర్శకత్వంలో తెరకెక్కుతున్న 'ఎన్‌బీకే111', అక్కినేని నాగచైతన్య హీరోగా కార్తీక్ వర్మ దండు రూపొందిస్తున్న 'వృషకర్మ' చిత్రాలు జీ5 ద్వారా ప్రేక్షకులను పలకరించనున్నాయి. 

వీటితో పాటు, విక్టరీ వెంకటేశ్, నందమూరి కల్యాణ్ రామ్ ప్రధాన పాత్రల్లో అనిల్ రావిపూడి దర్శకత్వం వహిస్తున్న 'జనవరి 12 విడుదల', అఖిల్ అక్కినేని హీరోగా మురళీ కిశోర్ అబ్బూరు తెరకెక్కించిన 'లెనిన్', అల్లరి నరేశ్ నటిస్తున్న 'కనకదుర్గ' వంటి క్రేజీ ప్రాజెక్టులు కూడా ఈ జాబితాలో ఉన్నాయి. ఇవే కాకుండా 'జననాయకుడు', 'హాయ్', 'డిమాంటీ కాలనీ 2', 'ఏ క్వీన్', 'వీరప్పన్ 2' వంటి డబ్బింగ్ చిత్రాలు కూడా వినోదాన్ని పంచనున్నాయి.

ఒరిజినల్స్‌తో సరికొత్త వినోదం
సినిమాలతో పాటు ఒరిజినల్ కంటెంట్‌కు కూడా జీ5 పెద్దపీట వేస్తోంది. విలక్షణ నటి నివేదా థామస్ ప్రధాన పాత్రలో నటిస్తున్న ‘శ్రీమతి’ అనే ఒరిజినల్ సిరీస్ ప్రేక్షకులను ఆకట్టుకోనుంది. అలాగే భరత్ నివాస్, శివాజీ రాజా కీలక పాత్రల్లో రూపొందుతున్న క్రైమ్ థ్రిల్లర్ ‘పంచనామా’ కూడా ఉత్కంఠను రేకెత్తించనుంది. వీటికి తోడు, గతంలో ఎంతో ఆదరణ పొందిన సెలబ్రిటీ గేమ్ షో ‘జయమ్ము నిశ్చయమ్మురా’.. ఈసారి జగపతి బాబు హోస్ట్‌గా 'జయమ్ము నిశ్చయమ్మురా 2' పేరుతో పునఃప్రారంభం కానుండటం మరో విశేషం.

ఈ భారీ లైనప్ ఆవిష్కరణ సందర్భంగా జీ5 తెలుగు, తమిళం, మలయాళం బిజినెస్ హెడ్ లాయిడ్ సి. జేవియర్ మాట్లాడుతూ, "తెలుగు ప్రేక్షకులు ఎప్పుడూ కొత్తదనాన్ని, తమ మనసుకు దగ్గరయ్యే కథలను ఆదరిస్తారు. వారి అభిరుచిని అర్థం చేసుకుని, భావోద్వేగాలకు కనెక్ట్ అయ్యేలా ఈ కొత్త కంటెంట్ లైనప్‌ను రూపొందించాం. ‘జయమ్ము నిశ్చయమ్మురా 2’ వంటి పాపులర్ షోలతో పాటు ‘శ్రీమతి’, ‘పంచనామా’ లాంటి విభిన్నమైన ఒరిజినల్స్ అందిస్తున్నాం. ప్రతి కథలోనూ ప్రత్యేకత ఉండేలా, ధైర్యంగా, ప్రేక్షకులను ఆకట్టుకునేలా ఈ లైనప్‌ను తీర్చిదిద్దాం" అని వివరించారు.

వినోదంలో సరికొత్త ప్రయోగాలు
సినిమాలు, సిరీస్‌లకే పరిమితం కాకుండా, వినోదంలో సరికొత్త ప్రయోగాలకు జీ5 శ్రీకారం చుట్టింది. ఏఐ (ఆర్టిఫిషియల్ ఇంటెలిజెన్స్) ఆధారిత స్టోరీ టెల్లింగ్‌తో ‘గరుడ’, ‘విక్రమ్ బేతాళ్’, ‘శివ్ సతి’, ‘చంద్రకాంత’, ‘తిరుపతి బాలాజీ’, ‘నర్మద’, ‘రామ్ ఆంజనేయ యుద్ధ్’ వంటి సరికొత్త కథనాలను అందించనుంది. 

అలాగే పిల్లల కోసం ‘బార్బరీక్’, ‘కుండక మండక్క’ వంటి ప్రత్యేక కంటెంట్‌ను, క్రీడాభిమానుల కోసం ఫిఫా, బుండెస్ లీగా, కోపా ఇటాలియా, ఐఎల్‌టీ20 వంటి లైవ్ స్పోర్ట్స్ ఈవెంట్లను కూడా అందిస్తూ తన పోర్ట్‌ఫోలియోను విస్తృతం చేసింది. మొత్తం మీద, ఈ భారీ లైనప్‌తో జీ5 తెలుగు ఓటీటీ మార్కెట్లో తన పోటీని మరో స్థాయికి తీసుకెళ్లడమే కాకుండా, విభిన్న అభిరుచులున్న ప్రేక్షకులందరినీ ఆకట్టుకోవాలనే స్పష్టమైన లక్ష్యంతో ముందుకు సాగుతోంది.