టీమిండియాలో కీలక మార్పు.. కొత్త ఫీల్డింగ్ కోచ్‌గా సుభదీప్ ఘోష్‌

శ్రీలంకతో జరగనున్న కీలకమైన టెస్ట్ సిరీస్‌కు ముందు బీసీసీఐ జట్టు సహాయక సిబ్బందిలో ముఖ్యమైన మార్పు చేసింది. టీమిండియా నూతన ఫీల్డింగ్ కోచ్‌గా సుభదీప్ ఘోష్‌ను నియమించింది. ఇప్పటివరకు ఈ బాధ్యతల్లో ఉన్న టి. దిలీప్ స్థానంలో అతడు బాధ్యతలు స్వీకరించనున్నాడు.

ఆగస్టు 15న గాలెలో జరిగే తొలి టెస్టుతో భారత్-శ్రీలంక సిరీస్ ప్రారంభం కానుంది. రెండో టెస్టు ఆగస్టు 23 నుంచి కొలంబోలోని ఎస్‌ఎస్‌సీ మైదానంలో జరుగుతుంది. ఈ పర్యటనకు ముందు, భారత జట్టు ఆగస్టు 7 నుంచి కొలంబోలో మూడు రోజుల ప్రాక్టీస్ మ్యాచ్ ఆడనుంది. ఈ సిరీస్ నుంచే సుభదీప్ ఘోష్ తన బాధ్యతలను మొదలుపెట్టనున్నాడు.

57 ఏళ్ల సుభదీప్ ఘోష్‌కు కోచింగ్‌లో విస్తృతమైన అనుభవం ఉంది. గతంలో రెండేళ్లపాటు భారత మహిళల క్రికెట్ జట్టుకు ఫీల్డింగ్ కోచ్‌గా సేవలందించాడు. 2022 మహిళల వన్డే ప్రపంచకప్, 2023 టీ20 ప్రపంచకప్‌లలో అత‌ను జట్టుతో పనిచేశాడు. అంతేగాక ఇండియా 'ఏ' జట్లకు, అసోం సీనియర్ పురుషుల జట్టుకు హెడ్ కోచ్‌గా కూడా వ్యవహరించాడు. ఆటగాడిగా అసోం, రైల్వేస్ తరఫున 17 ఫస్ట్-క్లాస్, 17 లిస్ట్ 'ఏ' మ్యాచ్‌లు ఆడాడు.

ఇంతకుముందు ఫీల్డింగ్ కోచ్‌గా ఉన్న టి.దిలీప్ కాంట్రాక్ట్ ముగియడంతో బీసీసీఐ దానిని పునరుద్ధరించలేదు. 2021 నుంచి 2025 బోర్డర్-గవాస్కర్ ట్రోఫీ వరకు, ఆ తర్వాత 2025 ఇంగ్లండ్ పర్యటనకు ఏడాది కాంట్రాక్ట్‌పై పనిచేశాడు. మరోవైపు జట్టు సహాయక కోచ్‌గా ఉన్న ర్యాన్ టెన్ డెస్కాటె కూడా తన పదవి నుంచి తప్పుకున్నాడు. ఐపీఎల్ ఫ్రాంచైజీ కోల్‌కతా నైట్ రైడర్స్‌లో 'హెడ్ ఆఫ్ క్రికెట్ స్ట్రాటజీ'గా కొత్త బాధ్యతలు చేపట్టాడు.

గత ఏడాది నవంబర్‌లో దక్షిణాఫ్రికాతో స్వదేశంలో సిరీస్ ఆడిన తర్వాత, భారత్ ఆడబోతున్న తొలి వరల్డ్ టెస్ట్ ఛాంపియన్‌షిప్ (డబ్ల్యూటీసీ) సిరీస్ ఇదే కావడం గమనార్హం. ఈ నేపథ్యంలో కొత్త ఫీల్డింగ్ కోచ్ నియామకం జట్టు ప్రదర్శనపై ఎలాంటి ప్రభావం చూపుతుందో చూడాలి.