మోదీ నాయకత్వంపై ఫిలిప్పీన్స్ ప్రశంసలు.. అత్యున్నత స్థాయిలో ఇరు దేశాల సంబంధాలు

ప్రధాని నరేంద్ర మోదీ నాయకత్వంలో భారత్ అద్భుతమైన పరివర్తనకు లోనైందని, 'వికసిత భారత్' లక్ష్యం దిశగా దేశం శరవేగంగా దూసుకుపోతోందని భారత్‌లోని ఫిలిప్పీన్స్ రాయబారి జోసెల్ ఎఫ్. ఇగ్నాసియో ప్రశంసించారు. భారత్-ఫిలిప్పీన్స్ మధ్య ద్వైపాక్షిక సంబంధాలు ప్రస్తుతం అత్యున్నత స్థాయిలో ఉన్నాయని, భవిష్యత్తులో ఈ బంధం మరింత వృద్ధి చెందేందుకు అపారమైన అవకాశాలు ఉన్నాయని ఆయన పేర్కొన్నారు.

రెండు దేశాల మధ్య ద్వైపాక్షిక వాణిజ్యం 2023లోనే 3 బిలియన్ డాలర్ల మైలురాయిని అధిగమించిందని, ప్రస్తుతం ఇది 4 బిలియన్ డాలర్లకు చేరువలో ఉందని రాయబారి వెల్లడించారు. సుమారు దశాబ్దం కాలం తర్వాత ఇరు దేశాల మధ్య ప్రత్యక్ష విమాన సర్వీసులు పునఃప్రారంభం కావడంతో పర్యాటక రంగం గణనీయంగా పుంజుకుందని తెలిపారు. పర్యాటకం, స్వల్పకాలిక వ్యాపార పర్యటనల నిమిత్తం వచ్చే భారతీయులకు 14 రోజుల పాటు తమ దేశంలోకి వీసా రహిత ప్రవేశాన్ని కల్పిస్తున్నట్లు ఆయన వివరించారు.

2025 ఆగస్టులో ప్రధాని మోదీ, ఫిలిప్పీన్స్ అధ్యక్షుడు మార్కోస్ మధ్య ఢిల్లీలో జరిగిన భేటీ ఇరు దేశాల బంధాన్ని మరింత పటిష్టం చేసిందని ఇగ్నాసియో అభిప్రాయపడ్డారు. ఆర్థిక శ్రేయస్సు, చట్టబద్ధమైన పాలన, ఇంధన, ఆహార భద్రత, డిజిటల్ మౌలిక సదుపాయాల వంటి కీలక అంతర్జాతీయ అంశాలపై ఇరు దేశాలు ఏకాభిప్రాయంతో ఉన్నాయని తెలిపారు. వ్యూహాత్మక భాగస్వామ్యంలో భాగంగా రక్షణ, సైనిక రంగాల్లో సహకారాన్ని మరింత విస్తృతం చేసుకుంటున్నట్లు ఆయన వెల్లడించారు.

ఆసియాన్-ఇండియా సమావేశం, క్వాడ్ విదేశాంగ మంత్రుల భేటీ నేపథ్యంలో భారత విదేశాంగ మంత్రి ఎస్. జైశంకర్ మనీలా పర్యటనను స్వాగతిస్తున్నట్లు రాయబారి తెలిపారు. జైశంకర్ తరచూ జరుపుతున్న ఈ పర్యటనలు ద్వైపాక్షిక సంబంధాలను మరింత బలోపేతం చేస్తున్నాయని ఆయన పేర్కొన్నారు.