గృహప్రవేశం రోజే గుండె ఆగింది.. అమెరికాలో పల్నాడు యువకుడి అకాల మరణం

ఉన్నత భవిష్యత్తు కోసం అమెరికా వెళ్లిన ఓ తెలుగు యువకుడి జీవితంలో తీవ్ర విషాదం చోటుచేసుకుంది. కష్టపడి చదివి, ఉద్యోగం సంపాదించి, సొంత ఇల్లు కొనుక్కున్న ఆనందాన్ని తల్లిదండ్రులతో పంచుకుంటున్న సమయంలోనే విధి చిన్నచూపు చూసింది. కొత్త ఇంటి గృహప్రవేశ వేడుక జరుగుతుండగా గుండెపోటుకు గురై ఆ యువకుడు ప్రాణాలు కోల్పోయాడు. ఈ ఘటన పల్నాడు జిల్లాలో తీవ్ర విషాదాన్ని నింపింది.

వివరాల్లోకి వెళితే.. పల్నాడు జిల్లా, గురజాల మండలం, దైద గ్రామానికి చెందిన రావిపాటి వెంకట రవితేజ (34) 2019లో ఉన్నత విద్య కోసం అమెరికా వెళ్లారు. అక్కడ చదువు పూర్తి చేసి, సాఫ్ట్‌వేర్ ఇంజనీర్‌గా మంచి ఉద్యోగంలో స్థిరపడ్డారు. ఒహియో రాష్ట్రంలోని కీవ్‌లాండ్‌లో నివాసం ఉంటూ ఇటీవలే ఓ కొత్త ఇంటిని కొనుగోలు చేశారు. ఈ ఇంటి గృహప్రవేశ కార్యక్రమం కోసం తన తల్లిదండ్రులు కోటేశ్వరమ్మ, శ్రీనివాసరావులను అమెరికాకు ఆహ్వానించారు. కొడుకు ప్రగతిని చూసి ఆ తల్లిదండ్రులు ఎంతో మురిసిపోయారు.

ఈ నెల 18వ తేదీ రాత్రి కుటుంబ సభ్యులందరూ కలిసి ఆనందంగా భోజనం చేశారు. సంతోషంగా గడుపుతున్న ఆ సమయంలో రవితేజకు అకస్మాత్తుగా తీవ్రమైన ఛాతీ నొప్పి వచ్చింది. వెంటనే కుటుంబ సభ్యులు 911కు సమాచారం అందించడంతో పారామెడికల్ సిబ్బంది వచ్చి సమీపంలోని ఆసుపత్రికి తరలించారు. అక్కడ పరీక్షించిన వైద్యులు, గుండె నుంచి శరీరానికి రక్తాన్ని సరఫరా చేసే ప్రధాన రక్తనాళంలోని పొర చిరిగిపోయిందని గుర్తించారు.

వెంటనే శస్త్రచికిత్స చేయాలని చెప్పడంతో కుటుంబ సభ్యులు అంగీకరించారు. అయితే, సర్జరీ చేసినప్పటికీ రవితేజ ఆరోగ్యం మెరుగుపడలేదు. పరిస్థితి విషమించడంతో చికిత్స పొందుతూ ఆదివారం ఆసుపత్రిలో తుదిశ్వాస విడిచారు. కళ్ల ముందే కొడుకు  కుప్పకూలిపోవడంతో తల్లిదండ్రులు, భార్య వందన కన్నీరుమున్నీరుగా విలపిస్తున్నారు. రవితేజకు రెండేళ్ల కుమారుడు విహాన్ ఉన్నాడు. మృతదేహాన్ని స్వగ్రామానికి తీసుకురావడం కష్టతరమవడంతో అమెరికాలోనే అంత్యక్రియలు నిర్వహించాలని కుటుంబ సభ్యులు నిర్ణయించుకున్నారు. ఈ విషాద వార్త తెలియడంతో దైద గ్రామంలో విషాద ఛాయలు అలుముకున్నాయి.