రెజ్లింగ్‌లో భారత్ హవా.. హంగేరి టోర్నీలో పతకాల పంట పండించిన మల్లయోధులు!

హంగేరి రాజధాని బుడాపెస్ట్‌లో జరుగుతున్న పొల్యాక్ ఇమ్రే అంతర్జాతీయ సీనియర్ ర్యాంకింగ్ రెజ్లింగ్ టోర్నమెంట్‌లో భారత మల్లయోధులు అద్భుత ప్రదర్శనతో దూసుకుపోతున్నారు. టోర్నీ మూడో రోజైన శుక్రవారం మహిళల విభాగంలో భారత రెజ్లర్లు పతకాల పంట పండించారు. అండర్-17 మాజీ ప్రపంచ ఛాంపియన్ నేహ మహిళల 59 కేజీల విభాగంలో పట్టుదలగా పోరాడి స్వర్ణ పతకాన్ని కైవసం చేసుకుంది.

సీనియర్ సర్క్యూట్‌లో ఈ ఏడాది అద్భుత ఫామ్‌లో ఉన్న నేహ.. ఫైనల్ మ్యాచ్‌లో అమెరికాకు చెందిన బలమైన ప్రత్యర్థి అబిగైల్ ఈ.నెట్టెపై ఆధిపత్యం చెలాయించింది. ఉత్కంఠభరితంగా సాగిన ఈ పోరులో ఒత్తిడిని అధిగమించి 6-4 పాయింట్ల తేడాతో విజయం సాధించింది. టోర్నీ మొదటి రోజే అమన్ సెహ్రావత్ సాధించిన గోల్డ్ మెడల్ తర్వాత, భారత్‌కు లభించిన రెండో స్వర్ణం ఇది.

మరోవైపు 62 కేజీల విభాగంలో భారత్‌కు రజతం, కాంస్య పతకాలు దక్కాయి. ఫైనల్ చేరిన మానసి.. కెనడాకు చెందిన అనా గొంజాలెజ్‌తో తలపడింది. అయితే మ్యాచ్ మధ్యలో దురదృష్టవశాత్తూ గాయపడటంతో ఆమె పోరును ముగించాల్సి వచ్చింది. దీంతో ఆమెకు రజత పతకం దక్కింది. ఇదే విభాగంలో జరిగిన కాంస్య పతక పోరులో భారత రెజ్లర్ సవిత 14-5 తేడాతో కజకిస్తాన్‌కు చెందిన ఇరినా కుజ్నెత్సోవాను పూర్తిగా చిత్తు చేసి కాంస్యాన్ని సొంతం చేసుకుంది. కాగా, గురువారం రాత్రి జరిగిన 55 కేజీల విభాగంలో హన్సిక లాంబా కూడా రజత పతకం సాధించింది.

ప్రస్తుతం ఈ మూడు పతకాలతో కలిపి భారత రెజ్లింగ్ జట్టు మొత్తం 8 పతకాలతో (2 స్వర్ణాలు, 2 రజతాలు, 4 కాంస్యాలు) పట్టికలో పటిష్ట స్థితికి చేరుకుంది. శనివారం నుంచి గ్రీకో-రోమన్ విభాగంతో పాటు మిగిలిన మహిళల కేటగిరీల్లో భారత రెజ్లర్లు బరిలోకి దిగనున్నారు.