అక్కినేని ఫ్యామిలీలో అఖిలే బెస్ట్ యాక్టర్.. నాగార్జునపై ఒట్టేసి మరీ చెప్పిన ఆర్జీవీ!

సంచలన దర్శకుడు రామ్ గోపాల్ వర్మ మరోసారి తనదైన శైలిలో చేసిన వ్యాఖ్యలతో వార్తల్లో నిలిచారు. యువ హీరో అఖిల్ అక్కినేని నటించిన తాజా చిత్రం 'లెనిన్' చూసిన ఆయన.. అఖిల్ నటనకు ముగ్ధుడై సోషల్ మీడియా వేదికగా ప్రశంసల వర్షం కురిపించారు. అక్కినేని కుటుంబంలోనే అఖిల్ అత్యుత్తమ నటుడని, ఈ మాటను నాగార్జునపై ఒట్టేసి మరీ చెబుతున్నానంటూ ఆయన చేసిన ట్వీట్ ఇప్పుడు ఇండస్ట్రీలో హాట్ టాపిక్‌గా మారింది.

మురళీ కిషోర్ అబ్బూరు దర్శకత్వం వహించిన 'లెనిన్' చిత్రాన్ని వీక్షించిన అనంతరం ఆర్జీవీ తన ఎక్స్ ఖాతాలో స్పందించారు. "హే అఖిల్, ఇప్పుడే 'లెనిన్' చూశాను. సినిమా అద్భుతంగా ఉందనేది పక్కన పెడితే.. అక్కినేని ఫ్యామిలీలోనే నువ్వు బెస్ట్ యాక్టర్ అని నేను గ్రహించాను. ఈ మాట నాగార్జునపై ఒట్టు వేసి చెబుతున్నాను" అని వర్మ పోస్ట్ చేశారు.

అంతటితో ఆగకుండా, "కొన్ని సన్నివేశాల్లో పెద్దగా భావోద్వేగాలు లేకపోయినా నువ్వు ఎంతో తేలికగా, అద్భుతంగా నటించావు. ఇక ఎమోషనల్ సీన్స్‌లో అయితే దుమ్ములేపావు. నీలోని నటుడిని ఇంత అద్భుతంగా వాడుకున్నందుకు దర్శకుడు మురళీ కిషోర్ అబ్బూరుకు నా అభినందనలు" అంటూ వర్మ తన పోస్టులో పేర్కొన్నారు.

'సిసింద్రీ' చిత్రంతో బాల నటుడిగా పరిచయమై, 'అఖిల్' సినిమాతో హీరోగా అడుగుపెట్టిన అఖిల్, 'మోస్ట్ ఎలిజిబుల్ బ్యాచిలర్'తో తన మొదటి విజయాన్ని అందుకున్నారు. ఇప్పుడు భారతీయ సినిమాలో ట్రెండ్ సెట్టర్‌గా పేరుపొందిన ఆర్జీవీ నుంచి ఇలాంటి ప్రశంసలు రావడం అఖిల్ కెరీర్‌కు, 'లెనిన్' చిత్రానికి పెద్ద బూస్ట్ ఇస్తుందని సినీ విశ్లేషకులు భావిస్తున్నారు.