సల్మాన్ ఖాన్ ఇంటిపై కాల్పుల కేసులో కీలక మలుపు.. కోర్టులో లొంగిపోతానన్న బిష్ణోయ్!
- ముంబైలోని ప్రత్యేక 'మోకా' కోర్టులో అన్మోల్ బిష్ణోయ్ పిటిషన్ దాఖలు
- ప్రస్తుతం ఎన్ఐఏ కేసులో ఢిల్లీలోని తిహార్ జైలులో ఉన్న అన్మోల్
- తనను కోర్టులో హాజరుపరిచేలా ప్రొడక్షన్ వారెంట్ కోరుతూ అభ్యర్థన
- ఈ కేసులో లారెన్స్ బిష్ణోయ్తో పాటు వాంటెడ్ నిందితుడిగా ఉన్న అన్మోల్
ప్రస్తుతం అన్మోల్ బిష్ణోయ్, గ్యాంగ్స్టర్-ఉగ్రవాద నెట్వర్క్కు సంబంధించిన కేసులో జాతీయ దర్యాప్తు సంస్థ (ఎన్ఐఏ) అరెస్టు చేయడంతో ఢిల్లీలోని తిహార్ జైలులో జ్యుడీషియల్ కస్టడీలో ఉన్నాడు. 2025 నవంబర్లో అమెరికా నుంచి అతడిని భారత్కు అప్పగించిన విషయం తెలిసిందే. ఎన్ఐఏ కేసులో జైలులో ఉన్నందున, న్యాయపరమైన ఆదేశాలు లేకుండా ముంబై కోర్టులో హాజరుకాలేనని, అందువల్ల తనను కోర్టులో హాజరుపరిచేలా తిహార్ జైలు అధికారులకు ప్రొడక్షన్ వారెంట్ జారీ చేయాలని అన్మోల్ తన పిటిషన్లో కోరాడు.
"న్యాయమైన విచారణ కోసం స్వచ్ఛందంగా లొంగిపోయి, న్యాయ ప్రక్రియలో పాల్గొనాలని భావిస్తున్నాను" అని అన్మోల్ తన అప్లికేషన్లో పేర్కొన్నాడు. తాను లొంగిపోవడం వల్ల ప్రాసిక్యూషన్కు ఎలాంటి నష్టం జరగదని, పైగా విచారణ వేగవంతం కావడానికి దోహదపడుతుందని వాదించాడు. గురువారం ఈ పిటిషన్పై స్పందించిన ప్రత్యేక జడ్జి ఎస్ఆర్ నవేందర్, సమాధానం దాఖలు చేయాలని పబ్లిక్ ప్రాసిక్యూటర్ను ఆదేశించారు.
2024 ఏప్రిల్ 14న ముంబై బాంద్రాలోని గెలాక్సీ అపార్ట్మెంట్లో ఉన్న సల్మాన్ ఖాన్ నివాసంపై ఇద్దరు దుండగులు కాల్పులు జరిపారు. ఈ దాడి వెనుక లారెన్స్ బిష్ణోయ్ గ్యాంగ్ హస్తం ఉందని ఆరోపిస్తూ ముంబై పోలీసులు మోకా చట్టం కింద కేసు నమోదు చేశారు. ఈ కేసులో విక్కీ గుప్తా, సాగర్ పాల్ సహా ఐదుగురు నిందితులు జ్యుడీషియల్ కస్టడీలో ఉండగా, వారిపై విచారణ కొనసాగుతోంది. మరో నిందితుడు అనుజ్ థాపన్ పోలీసు కస్టడీలో మరణించాడు. లారెన్స్ బిష్ణోయ్తో పాటు అన్మోల్ను కూడా ఈ కేసులో వాంటెడ్ నిందితులుగా పోలీసులు ప్రకటించారు.
