భారత క్రికెట్ జట్టు మాజీ కెప్టెన్, చెన్నై సూపర్ కింగ్స్ (సీఎస్‌కే) దిగ్గజం మహేంద్ర సింగ్ ధోనీ.. తన ఐపీఎల్ భవిష్యత్తుపై నెలకొన్న ఉత్కంఠకు తెరదించే ప్రయత్నం చేశాడు. పిక్క కండరాల గాయం కారణంగా 2026 ఐపీఎల్ సీజన్ మొత్తానికి దూరమైన ధోనీ, తన రీఎంట్రీపై తొలిసారిగా స్పందించాడు. తన ఫిట్‌నెస్‌పై డిసెంబర్ లోపు ఒక స్పష్టత వచ్చాక, ఐపీఎల్‌లో కొనసాగడంపై తుది నిర్ణయం తీసుకుంటానని వెల్లడించాడు.

బెంగళూరులో జరిగిన ఓ ఆరోగ్య కార్యక్రమానికి హాజరైన ధోనీని.. మరో సీజన్ ఆడే అవకాశం ఉందా? అని ప్రశ్నించగా.. "డాక్టర్, నేను ముందుగా అన్ని పరీక్షలు చేయించుకోవాలి. మీరు నాకు పూర్తి నివేదిక ఇవ్వాలి. ఆ తర్వాత, డిసెంబర్ లోపు మరో సీజన్ ఆడేంత బలంగా నేను ఉన్నానో లేదో చూసుకోవాలి" అని అన్నాడు.

అంతటితో ఆగకుండా, "ఒకవేళ నేను ఆడలేకపోయే పరిస్థితి వస్తే, ఈ పాత వింటేజ్ వాహనం రోడ్డుపై సరిగ్గా నడిచేలా చూడాల్సిన బాధ్యత మీదే (వైద్యులదే). కాబట్టి ఒత్తిడంతా వారిపైనే ఉంది" అని చమత్కరించాడు.  

2027 ఐపీఎల్ నాటికి దాదాపు 46 ఏళ్లకు చేరువకానున్న ధోనీ, తన కెరీర్‌లో 278 ఐపీఎల్ మ్యాచ్‌లలో 38.30 సగటుతో 5,439 పరుగులు సాధించాడు. అతడి సారథ్యంలో చెన్నై సూపర్ కింగ్స్ ఐదుసార్లు ఐపీఎల్ టైటిల్‌ను కైవసం చేసుకుంది. అయితే, గత రెండు సీజన్లలో రుతురాజ్ గైక్వాడ్ కెప్టెన్సీలో సీఎస్‌కే ప్రదర్శన నిరాశపరిచింది. 2025లో చివరి స్థానంలో నిలవగా, 2026లో ఎనిమిదో స్థానంతో సరిపెట్టుకుంది. ఈ నేపథ్యంలో, ధోనీ ఫిట్‌గా ఉంటే కచ్చితంగా జట్టులో కొనసాగాలని సీఎస్‌కే యాజమాన్యం కూడా ఆశిస్తోంది. డిసెంబర్‌లో మహీ తీసుకోబోయే నిర్ణయం కోసం అభిమానులు ఆసక్తిగా ఎదురుచూస్తున్నారు.